• facebook
  • whatsapp
  • telegram

Scholarships: 1-8 తరగతుల మైనార్టీ విద్యార్థులకు ఉపకార వేతనాలపై సందిగ్ధం

కేంద్ర ప్రభుత్వ నిర్ణయంతో ఆందోళన
రాష్ట్రంలో 40-50 వేల మందిపై ప్రభావం

ఈనాడు, హైదరాబాద్‌: రాష్ట్రంలో ఒకటి నుంచి ఎనిమిదో తరగతి వరకు చదువుతున్న మైనార్టీ విద్యార్థుల ప్రీమెట్రిక్‌ ఉపకార వేతనాలపై సందిగ్ధం నెలకొంది. ఈ విద్యా సంవత్సరంలో మైనార్టీ సంక్షేమ శాఖకు వచ్చిన ఉపకార వేతనాల దరఖాస్తుల్లో 9, 10 తరగతుల విద్యార్థులవి మాత్రమే పరిష్కరించాలని కేంద్రం ఆదేశాలు జారీ చేయడమే ఇందుకు కారణం. దీనిపై పేద విద్యార్థుల తల్లిదండ్రులు ఆందోళన చెందుతున్నారు. ఈ ఉపకార వేతనాల కోసం రాష్ట్రంలో 1-10 తరగతి వరకు చదువుతున్న విద్యార్థులు దాదాపు 1.6 లక్షల మంది దరఖాస్తు చేసుకున్నారు. తెలంగాణకు ఈ కోటా కింద కేంద్రం ఏటా 65 వేల మంది విద్యార్థులకు ఉపకార వేతనాలు మంజూరు చేస్తోంది. ఇందులో 40-50వేలమందిపై ప్రభావం పడనుంది. 1-5 తరగతి విద్యార్థులకు ప్రతి నెలా రూ.100 చొప్పున, 5-10 వరకు విద్యార్థులకు రూ.350 చొప్పున సంవత్సరంలో 10 నెలల పాటు చెల్లిస్తోంది. దీంతో పాటు ఏడాదికి ప్రవేశ ఫీజు కింద రూ.500, పుస్తకాలు, ఇతర ఖర్చుల కింద ప్రతి నెలా మరో రూ.వంద చొప్పున ఇస్తోంది. ఈ ఏడాదికి దరఖాస్తులు తీసుకున్న తరువాత కేంద్ర ప్రభుత్వం ప్రత్యేక నోటీసు జారీ చేసింది.
విద్యాహక్కు చట్టం కింద 1 నుంచి 8వ తరగతి వరకు ప్రభుత్వమే ఉచితంగా ప్రాథమిక విద్యను అందించాలి. తొమ్మిది, పది తరగతుల విద్యార్థులకు కొనసాగింపు విద్య కింద ప్రీ-మెట్రిక్‌ ఉపకార వేతనాలను సామాజిక న్యాయశాఖ, గిరిజన మంత్రిత్వ శాఖలు అందిస్తున్నాయి. ఇదే తరహాలో మైనార్టీ మంత్రిత్వశాఖ పరిధిలో తొమ్మిది, పది విద్యార్థులకు మాత్రమే ప్రీ-మెట్రిక్‌ ఉపకారవేతనాలు ఇవ్వాలని కేంద్రం నిర్ణయించింది. ఈ మేరకు ఆ విద్యార్థుల ఉపకార వేతనాల దరఖాస్తులు మాత్రమే పరిశీలించాలని రాష్ట్రస్థాయి, జిల్లా నోడల్‌ అధికారులకు ఆదేశాలు జారీ చేసింది. దీంతో 1-8 తరగతి విద్యార్థులందరూ కేంద్ర మైనార్టీ శాఖ ఉపకార వేతనాలకు దూరం కానున్నారు.

Read Latest jobs, Latest notifications and Latest govt jobs 

Follow us on Facebook, Twitter, Koo, Share chatGoogle News Subscribe our Youtube Channel.

Posted Date : 02-12-2022

గమనిక : ప్రతిభ.ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారులు, సంస్థల నుంచి వస్తాయి. మరి కొన్ని ప్రకటనలు పాఠకుల అభిరుచి మేరకు కృత్రిమ మేధస్సు సాంకేతికత సాయంతో ప్రదర్శితమవుతుంటాయి. ఆ ప్రకటనల్లోని ఉత్పత్తులను లేదా సేవలను పాఠకులు స్వయంగా విచారించుకొని, జాగ్రత్తగా పరిశీలించి కొనుక్కోవాలి లేదా వినియోగించుకోవాలి. వాటి నాణ్యత లేదా లోపాలతో ఈనాడు యాజమాన్యానికి ఎలాంటి సంబంధం లేదు. ఈ విషయంలో ఉత్తర ప్రత్యుత్తరాలకు, ఈ-మెయిల్స్ కి, ఇంకా ఇతర రూపాల్లో సమాచార మార్పిడికి తావు లేదు. ఫిర్యాదులు స్వీకరించడం కుదరదు. పాఠకులు గమనించి, సహకరించాలని మనవి.