• facebook
  • whatsapp
  • telegram

TS Gvt Jobs: ప్రైవేటు ఉద్యోగాలు వ‌దిలి.. ప్ర‌భుత్వ కొలువుల వైపు!

ప్రభుత్వ ఉద్యోగాలకు నోటిఫికేషన్ల నేపథ్యంలో రాష్ట్రంలో పరిస్థితి

పది పరీక్షలకు విద్యార్థులు సిద్ధమవుతున్నారు.. సోషల్‌ సబ్జెక్టులో మ్యాప్‌ పాయింటింగ్‌ చెప్పి ఒక గంటలో వెళ్లిపోదువు.. దయచేసి రండి  అని ఇటీవల టీచర్‌ ఉద్యోగం మానేసిన వ్యక్తికి ఫోను చేసి ఓ స్కూల్‌ ప్రిన్సిపల్‌ అభ్యర్థన. విద్యార్థులను ఉదయం స్కూల్‌కు తీసుకువచ్చి.. సాయంత్రం మళ్లీ ఇళ్లకు చేరిస్తే చాలు. నెలకు రూ. 15 వేలు ఇస్తాం.. అంటూ ఓ విద్యాసంస్థ యాజమాన్యం బస్సు సహాయకుల కోసం నెల రోజులుగా ప్రయత్నిస్తోంది.

ఈనాడు, హైదరాబాద్‌: రాష్ట్రవ్యాప్తంగా ఉద్యోగార్థులే కాకుండా చిరుద్యోగులు సర్కారు కొలువుల కల సాకారం చేసుకొనేందుకు సిద్ధమయ్యారు. ఇందుకోసం చేస్తున్న చిన్న చిన్న ఉద్యోగాలూ వదిలేస్తున్నారు. ఉపాధి ఉంది.. రండి అని పిలుస్తున్నా రావడం లేదు. వేల మంది  ఒక్కసారిగా ఇలా వెళ్లిపోవడంతో యాజమాన్యాలు ఇబ్బంది పడుతున్నాయి. ప్రైవేటు పాఠశాలలు, కళాశాలలు, దుకాణదారులు, మాల్స్‌, గేటెడ్‌ కమ్యూనిటీలు తదితరాలన్నింటిలోనూ ఇదే  పరిస్థితి. రాష్ట్రంలో ప్రభుత్వ జాబుల జాతర నడుస్తుండడంతోనే ఈ పరిస్థితి నెలకొందని పలు సంస్థలు పేర్కొంటున్నాయి.

 

ఒకదాని వెంట మరో ప్రకటనతో..
రాష్ట్రంలో 81 వేల ప్రభుత్వ ఉద్యోగాలకు ఒకదాని తర్వాత ఒకటిగా ప్రకటనలు వెలువడుతున్నాయి. ఇప్పటికే పోలీసు, గ్రూప్‌-1తో పాటు.. ఆర్టీఏ, ఎలక్ట్రిసిటీ సంస్థలు నోటిఫికేషన్లు ఇవ్వగా.. త్వరలోనే గ్రూప్‌-4 నోటిఫికేషన్‌ విడుదల చేస్తామని ప్రభుత్వం ఇటీవల ప్రకటించింది. దీంతో రూ.30వేల లోపు జీతం ఉన్న ప్రైవేటు ఉద్యోగులంతా ఏమాత్రం ఆలోచించకుండా దీర్ఘకాల సెలవులు పెట్టేసి.. అవసరమైతే మానేసి మరీ పుస్తకాలు చేతబట్టారు. హైదరాబాద్‌లో చదువుకుంటూ ఖాళీ సమయంలో పార్ట్‌టైమ్‌ ఉద్యోగాలు చేసేవారు సెలవులు పెట్టేశారు. దీంతో కుర్రాళ్లు దొరకడంలేదని ఆహార డెలివరీ సంస్థలు  వాపోతున్నాయి. మరోపక్క అనేక మంది క్యాబ్‌లను కూడా పక్కన పెట్టేశారు. ఐటీ సంస్థల్లో కార్యాలయ సిబ్బందీ రావడంలేదు. ‘‘ప్రస్తుతం 30 శాతం ఐటీ ఉద్యోగులే కార్యాలయాలకు వచ్చి పని చేస్తున్నారు. వారికి సహకారంగా ఉండే సిబ్బంది లేకపోవడంతో ఇంటి నుంచే పని చేసుకోమని సూచించామని’’ నగరంలోని ఓ ఐటీ సంస్థ సీఈవో చెప్పారు. ఇప్పుడు 22 నుంచి 40 ఏళ్ల వయసు వారు కొలువులొదిలి గ్రంథాలయాలు, కోచింగ్‌ కేంద్రాలు, విశ్వవిద్యాలయాల్లో చదువుతూ కనిపిస్తున్నారు.

 

కొలువు కొట్టాలని..: టి.శివ. రేవళ్లి మండలం, వనపర్తి జిల్లా

‘‘హైదరాబాద్‌లోని ఓ ఐటీ సంస్థలో అడ్మినిస్ట్రేషన్‌ విభాగంలో ఆపరేటర్‌గా పనిచేసేవాడిని. ఉద్యోగానికి రాజీనామా చేశా. గ్రూప్స్‌కు సన్నద్ధమవుతున్నా. గతంలో పోస్టులు తక్కువగా ఉండడంతో అవకాశం దక్కలేదు. ఈసారి కచ్చితంగా కొలువు కొట్టాలన్న లక్ష్యంతో ఉన్నా’’

 

భవిష్యత్తులో ఉండకపోచ్చని..: బండ రాకేశ్‌, వీరన్నపేట గ్రామం, మహబూబ్‌నగర్‌

‘‘నగరంలోని ప్రముఖ నిర్మాణ సంస్థలో టెక్నికల్‌ అసిస్టెంట్‌గా చేస్తున్నా. నెలకు రూ.15 వేలు ఇచ్చేవారు. ప్రభుత్వ నోటిఫికేషన్ల ప్రకటన వచ్చిన వెంటనే ఈ ఉద్యోగం మానేశా. మూడు నెలలుగా ఇంకేం వ్యాపకాలు పెట్టుకోకుండా సిద్ధం అవుతున్నా. ఒకేసారి ఇన్ని వేల పోస్టుల భర్తీ భవిష్యత్తులో ఉండకపోవచ్చు. అందుకే ఆర్థికంగా ఇబ్బందులున్నా కష్టపడి చదువుతున్నా’’.

 

********************************************************

స్టడీమెటీరియల్
 

1. వర్తమానాంశాలు – ప్రాంతీయ, జాతీయ, అంతర్జాతీయ అంశాలు
2. అంతర్జాతీయ సంబంధాలు, సంఘటనలు
3. జనరల్ సైన్స్ – శాస్త్ర, సాంకేతిక రంగాల్లో భారత దేశం సాధించిన విజయాలు
4. పర్యావరణ అంశాలు – విపత్తు నిర్వహణ – నివారణ, ఉపశమనం కోసం వ్యూహాలు
5. భార‌తదేశ ఆర్థిక‌, సామాజిక అభివృద్ధి
6. ప్రపంచ భూగోళ శాస్త్రం, భారత భూగోళ శాస్త్రం, తెలంగాణ రాష్ట్ర భూగోళ శాస్త్రం
7. భారత దేశ చరిత్ర, సంస్కృతి – వారసత్వం
8. భారత ‌రాజ్యాంగం, రాజ‌కీయ వ్యవ‌స్థ
9. భారతదేశంలో ప‌రిపాల‌న‌, ప్రభుత్వ విధానాలు
10. తెలంగాణ రాష్ట్ర విధానాలు
11. తెలంగాణ సమాజం, సంస్కృతి, వారసత్వం, కళలు, సాహిత్యం
12 .సామాజిక మిన‌హాయింపు/ వెలి ; లింగ, కుల‌, తెగ‌ల‌, వైక‌ల్యం మొద‌లైన హ‌క్కులు, స‌మ్మళిత విధానాలు
13 .లాజికల్ రీజనింగ్, అనలిటికల్ ఎబిలిటీ అండ్ డేటా ఇంటర్ ప్రిటేషన్

********************************************************

మరింత సమాచారం ... మీ కోసం!

‣ పోలీసు ఉద్యోగ పరీక్షలకు ఇదీ సిలబస్‌!

‣ టీఎస్‌పీఎస్సీ గ్రూప్స్‌ సిలబస్‌, పరీక్షావిధానం, పోస్టుల వర్గీకరణ

‣ రాజ్యాంగంలో ఏవి ప్రధానం?

‣ నీట్‌లో ఏ సబ్జెక్ట్‌ ఎలా చదవాలి?

Read Latest jobs, Latest notifications and Latest govt jobs 

Follow us on Facebook, Twitter, Koo, Share chatGoogle News Subscribe our Youtube Channel.

Posted Date : 26-05-2022

గమనిక : ప్రతిభ.ఈనాడు.నెట్లో వచ్చే ప్రకటనలు అనేక దేశాల నుండి, వ్యాపారస్తులు లేదా వ్యక్తుల నుండి వివిధ పద్ధతులలో సేకరించబడతాయి. ఆయా ప్రకటనకర్తల ఉత్పత్తులు లేదా సేవల గురించి ఈనాడు యాజమాన్యానికీ, ఉద్యోగస్తులకూ ఎటువంటి అవగాహనా ఉండదు. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సు సాంకేతికతతో పంపబడతాయి. ఏ ప్రకటనని అయినా పాఠకులు తగినంత జాగ్రత్త వహించి, ఉత్పత్తులు లేదా సేవల గురించి తగిన విచారణ చేసి, తగిన జాగ్రత్తలు తీసుకొని కొనుగోలు చేయాలి. ఉత్పత్తులు / సేవలపై ఈనాడు యాజమాన్యానికి ఎటువంటి నియంత్రణ ఉండదు. కనుక ఉత్పత్తులు లేదా సేవల నాణ్యత లేదా లోపాల విషయంలో ఈనాడు యాజమాన్యం ఎటువంటి బాధ్యత వహించదు. ఈ విషయంలో ఎటువంటి ఉత్తర ప్రత్యుత్తరాలకీ తావు లేదు. ఫిర్యాదులు తీసుకోబడవు.