• facebook
  • whatsapp
  • telegram

గురుకుల ప్రవేశ పరీక్షలపై సందిగ్ధం

* కరోనా నేపథ్యంలో ప్రత్యామ్నాయాలపై దృష్టి

* ఎస్సీ సొసైటీ పరిధిలో రెండు పరీక్షలు రద్దు

* మిగిలిన సొసైటీల సమాలోచనలు

 

 

ఈనాడు, హైదరాబాద్‌: రాష్ట్రంలోని ఎస్సీ, ఎస్టీ, బీసీ, సాధారణ గురుకుల పాఠశాలలు, జూనియర్‌ కళాశాలల్లో ప్రవేశాలకు నిర్వహించాల్సిన పరీక్షలపై సందిగ్ధం నెలకొంది. కరోనా రెండో దశ ఉద్ధృతితోపాటు మూడో దశ ఉంటుందన్న ఊహాగానాలతో విద్యార్థుల ఆరోగ్యం దృష్ట్యా.. ప్రవేశ పరీక్షల నిర్వహణపై గురుకుల సొసైటీలు సమాలోచనలు చేస్తున్నాయి. ఇప్పటికే ఎస్సీ గురుకుల సొసైటీ జూనియర్‌ ఇంటర్‌ ప్రవేశ పరీక్షను రద్దుచేసింది. 2021-22 విద్యాసంవత్సరం ప్రారంభంపై ప్రభుత్వం తీసుకునే నిర్ణయం ఆధారంగా ప్రవేశాలపై ముందుకు వెళ్లాలని ఆయా గురుకుల సొసైటీలు భావిస్తున్నాయి. 

 

టీఎస్‌డబ్ల్యూఆర్‌జేసీ సెట్‌ రద్దు..

ఎస్సీ గురుకుల సొసైటీ పరిధిలోని జూనియర్‌ కళాశాలల్లో ప్రవేశానికి నిర్వహించాల్సిన టీఎస్‌డబ్ల్యూఆర్‌జేసీ సెట్‌-2021 రద్దయింది. పదో తరగతిలో సాధించిన గ్రేడు, సీజీపీఏ ఆధారంగా ప్రవేశాలు కల్పించనున్నట్లు ఆ సొసైటీ కార్యదర్శి ఆర్‌.ఎస్‌.ప్రవీణ్‌కుమార్‌ వెల్లడించారు. గురుకులాల్లో సీట్ల కోసం దరఖాస్తు చేసుకున్న అభ్యర్థులు జూన్‌ 7వ తేదీలోపు సబ్జెక్టుల వారీగా మార్కులు, సీజీపీఏ వివరాలను నమోదు చేయాలని సూచించారు. ఎస్సీ గురుకుల సొసైటీ పరిధిలోని సెంటర్‌ ఆఫ్‌ ఎక్స్‌లెన్స్‌లో ప్రవేశానికి ఇప్పటికే తొలిదశ పరీక్ష జరిగింది. మేలో రెండోదశ పరీక్ష జరగాల్సి ఉంది. అయితే.. ఇప్పట్లో రెండో దశ పరీక్షను నిర్వహించడం సాధ్యం కాదని, తొలిదశ పరీక్ష మార్కుల ఆధారంగా ప్రవేశాలు కల్పించాలని సొసైటీ నిర్ణయించింది.

 

ఐదో తరగతి ప్రవేశాలపై..

ఎస్సీ, ఎస్టీ, బీసీ, సాధారణ గురుకులాల్లో ఐదో తరగతి ప్రవేశాల కోసం లక్ష మందికిపైగా విద్యార్థులు దరఖాస్తు చేసుకున్నారు. ఈ పరీక్ష ఇప్పటికే రెండు సార్లు వాయిదా పడింది. 2020-21 విద్యాసంవత్సరం ప్రవేశాల కోసం గత నవంబరులో పరీక్ష నిర్వహించి, ప్రవేశ ప్రక్రియను ముగించేలోపే రెండో దశ కరోనా మొదలైంది. ఈ నేపథ్యంలో ప్రస్తుత విద్యాసంవత్సరంలో ప్రవేశ పరీక్ష నిర్వహించాలా? వద్దా? ప్రత్యామ్నాయాలపై దృష్టి పెట్టాలా? అని సొసైటీలు తర్జనభర్జన పడుతున్నాయి. మైనార్టీ సొసైటీ తరహాలో లాటరీ పద్ధతిలో ఐదో తరగతి ప్రవేశాలను నిర్వహించే అంశాన్ని పరిశీలిస్తున్నాయి. 

 

15 వరకు బీసీ కళాశాలల్లో దరఖాస్తు గడువు 

బీసీ గురుకుల సొసైటీ పరిధిలోని పరిధిలోని 68 బాలుర, 70 బాలికల జూనియర్‌ కళాశాలల్లో కలిపి 12,500కు పైగా సీట్లు అందుబాటులో ఉన్నాయి. వీటిలో ప్రవేశానికి జూన్‌ 15వ తేదీతో దరఖాస్తు గడువు ముగియనుంది. గడువు పూర్తయిన తరువాత ప్రవేశాలపై నిర్ణయం తీసుకోవాలని సొసైటీ భావిస్తోంది. 
 

Posted Date : 02-06-2021