• facebook
  • whatsapp
  • telegram

Abroad Education: విదేశీ విద్యాదీవెన కొందరికేనా?

ఇబ్బందికరంగా మారిన టాప్‌-200 నిబంధనలు
కానూరు, న్యూస్‌టుడే: మూడేళ్ల తరువాత ప్రభుత్వం అమలు చేస్తున్న జగనన్న విదేశీ విద్యాదీవెన పథకం కొందరికే పరిమితమయ్యింది. క్యూస్‌ వరల్డ్‌ ర్యాంకింగ్స్‌లో టాప్‌-200 లోపు విశ్వవిద్యాలయాల్లో ప్రవేశం పొంది ఉండాలన్న నిబంధన విద్యార్థులకు ఇబ్బందికరంగా మారింది. సర్కారు ఓవైపు భారీ సాయం అందిస్తున్నట్లు చెబుతున్నా.. నిబంధనల పేరుతో అర్హుల జాబితాలో కోత వేస్తోందన్న విమర్శలు వ్యక్తమవుతున్నాయి.
ఉమ్మడి కృష్ణా, గుంటూరు జిల్లాల నుంచి ఏటా 2500 మంది విద్యార్థులు విదేశాల్లో పీజీ, పీహెచ్‌డీ, ఎంబీబీఎస్‌ చదవడానికి వెళుతున్నారు. ఇందులో పీజీ చేసేవారే అధికంగా ఉన్నారు. ఇటీవల  ప్రభుత్వం ఉచితంగా విదేశీ విద్యాదీవెన ప్రారంభించింది. దరఖాస్తుల ప్రక్రియ ఈ నెలాఖరు వరకు జరుగుతుంది.
కేవలం 200 విశ్వవిద్యాలయాల్లో మాత్రమే..: క్యూస్‌ వరల్డు ర్యాంకింగ్‌లో టాప్‌-100 విశ్వవిద్యాలయాల్లో సీటు సాధిస్తే రూ.కోటి, టాప్‌ 101-200 లోపు అయితే రూ.50 లక్షలు వరకు పూర్తి ఫీజును ప్రభుత్వం నాలుగు విడతల్లో చెల్లిస్తుంది. ఈ పథకం కింద బీసీ, ఎస్సీ, ఎస్టీ, ఈబీసీ విద్యార్థులు అర్హులు కావాలంటే ఈ వర్సిటీల్లో అడ్మిషన్లు పొంది ఉండాలన్న నిబంధన పెట్టారు.
ఏయే దేశాల్లో వర్సిటీలు ఉన్నాయంటే?: అమెరికాలో 45, నెదర్‌లాండ్సు 8, చైనా 7,  సౌత్‌కొరియా 7, యూకే 26,  జపాన్‌ 6, హాంకాంగ్‌ 5, ఫ్రాన్సు 5, కెనడా 8, మలేషియా 5, స్వీడన్‌ 5, స్విట్జర్లాండు 5, ఆస్ట్రేలియా 13, ఇండియా 3 (ఐఐటీలు), జర్మనీ 11. ఇవికాకుండా మరో 20 దేశాల్లో 1 నుంచి 3 వరకు టాప్‌-200 లోపు విశ్వవిద్యాలయాలు ఉన్నాయి.
గతంలో అవకాశం పొందినవారు: మన ప్రాంతంలోని విద్యార్థులు ఎక్కువగా యూఎస్‌, యూకే, కెనడా, ఆస్ట్రేలియా, జర్మనీ, చైనా దేశాల్లో విదేశీ విద్యను అభ్యసిస్తున్నారు. యూనివర్సిటీ ఆఫ్‌ సిడ్నీలో గతంలో చేరిన వారు ఒక్కరైతే.. 200లోపు విశ్వవిద్యాలయాల్లో చదివిన వారు 24లోపే ఉన్నారు. ఈ టాప్‌ వర్సిటీల్లో సీటు రావాలంటే బాగా కష్టపడి చదవాలి. మంచి స్కోరు రావాల్సి ఉంటుంది. ఇటువంటి విశ్వవిద్యాలయాల్లో చేరేందుకు నిబంధనలు పెట్టడం వల్ల ఎక్కువమందికి అవకాశం రావడం లేదు.
సీటు సాధించాలంటే..: జేవీ మూర్తి, ఎండీ, ఇన్‌విక్టా కన్సెల్టెన్సీ
ఇంజినీరింగ్‌ పూర్తి చేసి ఎంఎస్‌ చేయాలనుకునే వారు జీఆర్‌ఈ రాయాల్సి ఉంటుంది. ఎంబీఏ చేయాల్సిన వారు జీఎంఏటీ, రాయాల్సి ఉంటుంది. వీటితో పాటు ఐఈఎల్‌టీఎస్‌, టోఫెల్‌ పరీక్షలు కూడా రాయాల్సి ఉంటుంది.
 జీఆర్‌ఈ పరీక్షలో 340 మార్కులకు 315 వస్తేనే ఈ టాప్‌ 200 విశ్వవిద్యాలయాల్లో సీటు వస్తుంది.
 అలానే డిగ్రీ స్థాయిలో 70 శాతం పైబడి మార్కులు ఉండాలి.‌
విద్యార్థి డిగ్రీ స్థాయిలో చేసే ప్రాజెక్టు, పేపర్‌ పబ్లికేషన్‌, ఇంటర్న్‌షిప్‌లను సీటు ఇచ్చే సమయంలో పరిగణనలోకి తీసుకుంటున్నాయి.‌
అడ్మిషన్‌ సమయంలో చక్కని వ్యాసం రాయాల్సి ఉంటుంది.
ప్రభుత్వం పునరాలోచించాలి: కేఆర్‌ఎస్‌ రావు, విద్యావేత్త
విదేశీ విశ్వవిద్యాలయాల సంఖ్య మరింత పెంచాలి. లేకుంటే మధ్య తరగతి, పేద విద్యార్థులకు ఎక్కువ అవకాశం రాదు. టాప్‌ విశ్వవిద్యాలయాల్లో మన ప్రాంతం నుంచి ఎంపికయ్యే వారి సంఖ్య తక్కువగానే ఉంటోంది. ఈ నిబంధనపై ప్రభుత్వం పునరాలోచించాలి.
ఎక్కువ మందికి అవకాశం కల్పిస్తే మేలు: ఎల్‌. మహేష్‌, సాఫ్టువేర్‌ ఉద్యోగి
విదేశీ విద్య చదవడానికి గతంలో ఎక్కువ మందికి అవకాశం వచ్చింది. గత మూడున్నర ఏళ్లుగా ఈ పథకానికి వేలాది మంది ఎదురు చూస్తున్నారు. ఈసారి నిబంధనతో ఎంత మందికి అవకాశం వస్తుందో తెలియని పరిస్థితి నెలకొంది. ప్రభుత్వం అన్ని వర్గాల విద్యార్థులను దృష్టిలో పెట్టుకుంటే మేలు.

Read Latest jobs, Latest notifications and Latest govt jobs 

Follow us on Facebook, Twitter, Koo, Share chatGoogle News Subscribe our Youtube Channel.

Posted Date : 15-12-2022

గమనిక : ప్రతిభ.ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారులు, సంస్థల నుంచి వస్తాయి. మరి కొన్ని ప్రకటనలు పాఠకుల అభిరుచి మేరకు కృత్రిమ మేధస్సు సాంకేతికత సాయంతో ప్రదర్శితమవుతుంటాయి. ఆ ప్రకటనల్లోని ఉత్పత్తులను లేదా సేవలను పాఠకులు స్వయంగా విచారించుకొని, జాగ్రత్తగా పరిశీలించి కొనుక్కోవాలి లేదా వినియోగించుకోవాలి. వాటి నాణ్యత లేదా లోపాలతో ఈనాడు యాజమాన్యానికి ఎలాంటి సంబంధం లేదు. ఈ విషయంలో ఉత్తర ప్రత్యుత్తరాలకు, ఈ-మెయిల్స్ కి, ఇంకా ఇతర రూపాల్లో సమాచార మార్పిడికి తావు లేదు. ఫిర్యాదులు స్వీకరించడం కుదరదు. పాఠకులు గమనించి, సహకరించాలని మనవి.