‣ పోటీ పరీక్షల్లో లెక్కల చిట్కాలు
పోటీ పరీక్షల్లో వచ్చే కొన్ని ప్రశ్నలకు సమాధానాలు కనుక్కోవాలంటే.. గుణకారాలు వేగంగా చేయాల్సివుంటుంది. అందుకని స్పీడ్ మ్యాథ్స్ మెలకువల సాధన అవసరం. గత వారం కొన్ని హెచ్చవేతల విధానాల గురించి తెలుసుకున్నాం. ఈ వారం మరికొన్ని పద్ధతులు చూద్దాం!
ఏ సంఖ్యనైనా ‘5’ తో..
ఏ సంఖ్యనైనా ‘5’ తో గుణించే తేలికైన పద్ధతిని తెలుసుకుందాం.
ముందుగా ఇచ్చిన సంఖ్యకు చివరగా ఒక ‘0’ చేర్చాలి. ఆ తర్వాత ఆ సంఖ్యలో సగం తీసుకోవాలి. లేదా ఆ సంఖ్యను ‘2’ తో భాగించాలి. ఆ వచ్చిన ఫలితమే జవాబు అవుతుంది.
ఉదాహరణకు: 68752 × 5
ఈ సంఖ్యకు చివరగా ‘0’ చేర్చితే అది 687520 అవుతుంది.
దీన్ని ‘2’ తో భాగిస్తే 343760 వస్తుంది. ఇదే జవాబు.
68752 × 5 = 343760.
ఈ పద్ధతిలో ఎన్ని అంకెల సంఖ్యనైనా ‘5’ తో చాలా తేలికగా గుణించవచ్చు.
ఏదైనా సంఖ్యను ‘25’తో..
ఏదైనా సంఖ్యను ‘5’ తో గుణించడం చూశాం. దాదాపు ఇటువంటి పద్ధతిలోనే ‘25’తో గుణించడం చూద్దాం.
ఈ పద్ధతిలో ముందుగా ఇచ్చిన సంఖ్యకు చివరలో రెండు ‘00’ ఉంచాలి. తర్వాత ఆ సంఖ్యను ‘4’తో భాగిస్తే వచ్చే ఫలితమే జవాబు.
ఉదాహరణకు: 8437 × 25
ఇచ్చిన సంఖ్య 8437కు చివరలో రెండు ‘00’ ఉంచితే అది 843700 అవుతుంది. ఈ సంఖ్యను ‘4’తో భాగించాలి.
843700 ÷ 4 అప్పుడు 210925 వస్తుంది. ఇదే జవాబు!
ఈ పద్ధతిలో ఎన్ని అంకెల సంఖ్యనైనా ‘25’తో తేలికగా గుణించవచ్చు.
ఇచ్చిన సంఖ్యను ‘125’తో...
ఇదే విధంగా ఎన్ని అంకెల సంఖ్యనైనా ‘125’తో కూడా తేలికగానే గుణించవచ్చు.
ఇచ్చిన సంఖ్యకు చివరన మూడు ‘000’ ఉంచాలి. ఆ తర్వాత ఆ సంఖ్యను ‘8’తో భాగించాలి. ఆ వచ్చిన ఫలితమే జవాబు అవుతుంది.
ఉదాహరణకు: 3842 × 125
ముందుగా 3842కు చివర మూడు ‘000’ ఉంచాలి.
3842000. తర్వాత ఈ సంఖ్యను ‘8’తో భాగించాలి.
3842000 ÷ 8 అప్పుడు 480250 వస్తుంది. ఇదే సరైన జవాబు! ఇదే పద్ధతిలో ఇచ్చిన సంఖ్యను ‘625’తో గుణించడానికి సంఖ్య చివరన నాలుగు ‘0000’ ఉంచాలి. దాన్ని ‘16’తో భాగిస్తే జవాబు వస్తుంది. ఈ మెలకువలన్నీ గుర్తుపెట్టుకుని బాగా సాధన చేస్తే సంప్రదాయ పద్ధతిలో కంటే చాలా వేగంగా జవాబులు సాధించవచ్చు.