సముద్ర తరంగాలు - నిర్వచనం
పవనాల ప్రభావం వల్ల సముద్రంలోని నీరు శృంగం (Crest), ద్రోణి (Trough) రూపంలో కదలడాన్ని సముద్ర తరంగాలు అంటారు. వీటినే ‘సముద్ర కెరటాలు’ లేదా ‘సముద్ర అలలు’ అని కూడా పిలుస్తారు.
* సముద్ర తరంగాల్లో ఎత్తయిన భాగాన్ని శృంగం అని, లోతైన భాగాన్ని ద్రోణి అని అంటారు.
* వరుసగా ఉన్న రెండు శృంగాలు లేదా రెండు ద్రోణుల మధ్య దూరాన్ని తరంగదైర్ఘ్యం/ తరంగ పొడవు (wave length) అంటారు.
* శృంగం అగ్రం నుంచి ద్రోణి లోపలికి ఉన్న నిట్టనిలువు కొలతను తరంగ ఎత్తు అంటారు. తరంగం ఎత్తులోని సగభాగమే డోలనా పరిమితి (wave aptitude).
* తరంగం ఆవిర్భవించే చోట తరంగ శృంగం గానీ, ద్రోణిగానీ చాలా చిన్నగా ఉండి, కొద్దిపాటి చలనం ఉండటాన్ని స్వెల్ (swell) అంటారు.
* సముద్ర తరంగ శృంగం ఉవ్వెత్తున లేచి తటాలున మధ్యకు విరిగిపోవడాన్ని తరంగ విచ్ఛిత్తి అంటారు.
* విరిగిపోయిన తరంగం ముందుభాగం తీరం వైపునకు బలంగా తోసుకుని వస్తే దాన్ని ఫ్లంజ్ (flunge) అంటారు.
* తీరం వైపునకు బలంగా తోసుకువచ్చిన తరంగం ఒడ్డును తాకి, మళ్లీ అదే వేగంతో వెనక్కి సముద్రంలోకి వెళ్లినట్లయితే దాన్ని బ్యాక్ వాష్ అంటారు.
తరంగాల పుట్టుక, పెరుగుదల
* సముద్ర తరంగాల ఆవిర్భావం, పుట్టుక, పెరుగుదల, నశించిపోవడం మొదలైనవన్నీ పవనాల మీదే ఆధారపడి ఉంటాయి.
* సముద్ర ఉపరితలంపై గాలి వీస్తున్నప్పుడు శక్తి నెమ్మదిగా గాలి నుంచి సముద్ర జలాల మీదకు ప్రసరిస్తుంది లేదా బదిలీ అవుతుంది. అప్పుడు సముద్ర ఉపరితల జలాల్లో ఒక మోస్తరు కదలిక ఏర్పడి, అతి చిన్న తరంగాలు పుట్టుకొస్తాయి.
* వీటి శృంగాలు గుండ్రంగా, ద్రోణులు ×జు× ఆకారంలో ఉండి, తరంగదైర్ఘ్యం ఇంచుమించు 1.74 సెం.మీ. వరకు ఉంటుంది. వీటినే కాపిల్లరీ తరంగాలు అంటారు.
* పవనాల బలం, వేగం పెరిగేకొద్దీ తరంగం ఎత్తు, పొడవు పెరుగుతుంది. వాటి తరంగదైర్ఘ్యం 1.74 సెం.మీ. కంటే ఎక్కువగా ఉంటే గ్రావిటీ తరంగాలు అని పిలుస్తారు.
తరంగాల కదలిక
* సముద్రం ఒడ్డున నిలబడి చూస్తే దూరం నుంచి వచ్చే తరంగాలు ఒకదాని తర్వాత మరొకటి క్రమపద్ధతిలో వస్తున్నట్లు కనిపిస్తాయి. అయితే ఇది నిజం కాదు.
* ఒక కర్రముక్కను సముద్రంలో దూరంగా పడేసి గమనిస్తే, తరంగాలకు ఉండే శృంగం, ద్రోణి వల్ల అక్కడనే పైకీ, కిందికీ కదులుతుంది తప్ప ఎంతసేపటికీ ఒడ్డుకు రాదు.
* కర్రముక్క ఒడ్డుకు రావాలంటే... గాలి కారణంగా ముందుకు వస్తుంది తప్ప, తరంగాల కదలిక వల్ల మాత్రం రాదు.
* భారీ తుపానులు (చక్రవాతాలు) సంభవించినప్పుడు పవనాల శక్తి ఎక్కువ. అప్పుడు తరంగాల ఎత్తు 15 నుంచి 18 మీటర్ల వరకు ఉంటుంది.
* రష్యా దేశానికి చెందిన ఎఫ్.పి.షెప్పార్డ్ అట్లాంటిక్ మహాసముద్ర ఉత్తర భాగంలో సముద్ర తరంగాల ఎత్తు దాదాపు 22 మీటర్లు అని తన పరిశోధనల ద్వారా తెలిపారు.
* 1977, నవంబరు 19న వచ్చిన ‘దివిసీమ ఉప్పెన’లో సముద్ర అలల ఎత్తు సుమారు 20 మీటర్లని శాస్త్రవేత్తలు పేర్కొన్నారు.
సముద్ర పోటు - పాటులు
* సముద్ర నీటిమట్టం ఒక క్రమపద్ధతిలో కొంత నిర్ణీత వ్యవధిలో పెరుగుతూ, తగ్గుతూ ఉంటుంది.
* నీటిమట్టం పెరగడాన్ని పోటు (High Tide), తగ్గడాన్ని పాటు (Low Tide) అంటారు.
* ఈ పోటు, పాటు ఊర్ధ్వంగా (Vertical) ఉంటాయి తప్ప క్షితిజ సమాంతరంగా (Horizontal) ఉండవు.
* ప్రతి పోటు, పాటుల కాలపరిమితి 6 గం. 12 నిమిషాలు. అంటే ఒకరోజులో రెండుసార్లు సముద్రమట్టం పెరుగుతుంది, తగ్గుతుంది.
* పోటు పాటుల వల్ల కలిగే నీటిమట్టపు వ్యత్యాసాన్ని వేలా పరిమితి అంటారు. అయితే సముద్రంలో వచ్చే పోటు, పాటుల ఎత్తు అన్ని సముద్రాల్లో ఒకేలా ఉండదు.
* సాధారణంగా పోటు ఎత్తు 3 మీటర్ల నుంచి 16 మీటర్ల వరకు ఉంటుంది.
* పోటు, పాటులకు కారణం సూర్యుడు, చంద్రుడి గురుత్వాకర్షణ బలం.
పోటు, పాటుల్లో రకాలు
* మామూలు రోజుల్లో వచ్చే పోటు, పాటులతోపాటు కొన్ని ప్రత్యేక సమయాల్లోనూ పోట్లు సంభవిస్తాయి.
* అమావాస్య, పౌర్ణమి రోజుల్లో వచ్చే పోట్లను పర్వవేలా పోట్లు అంటారు.
* నెల మొదటి, నాలుగో వారంలో వచ్చే పోట్లు లఘువేలా పోట్లు.
* భూభ్రమణం వల్ల ప్రతిరోజు 12.1/2 గంటల వ్యవధిలో వచ్చే పోట్లను అర్ధ పగటి పోట్లు అంటారు.
* మార్చి 21, సెప్టెంబరు 23న సూర్యుడు భూమధ్యరేఖ మీద ఉన్నప్పుడు చంద్రుడు భూమికి దగ్గరలో ఉంటాడు. ఈ రోజుల్లో వచ్చే పోట్లు విషవత్తు పోట్లు.
* జూన్ 21, డిసెంబరు 22న వచ్చే పోట్లను అయస్కాంత పోట్లు అంటారు.
* పోటు బాగా ఎక్కువగా ఉన్నప్పుడు నీరు సముద్ర తీరంవైపు ప్రవహించి, పాటు వచ్చినప్పుడు తిరిగి సముద్రంలోకి వెళ్లిపోతుంది. ఈ రకమైన పోటును ‘వరద పోటు’ అని, పాటుని ‘పాటి’ అని అంటారు.
పోటు - పాటుల ఉపయోగాలు
* ఉప్పు మడుల తయారీకి అనుకూలంగా ఉంటాయి.
* నదీ ముఖద్వారాల వద్ద పేరుకుపోయిన ఇసుక మేటలు, చెత్త మొదలైన వ్యర్థ పదార్థాలను తొలగించడంలో ఇవి సహకరిస్తాయి.
* రేవు పట్టణాల్లోకి రాలేకపోయిన భారీ నౌకలు పోటు సమయంలో వచ్చి, మళ్లీ పాటు సమయంలో తిరిగి వెళ్లిపోతాయి. ఇటువంటి రేవు పట్టణాలను ‘టైడల్ పోర్ట్స్’ అంటారు.
ఉదా: గుజరాత్లోని కాండ్లా ఓడరేవు.
* సముద్రంలో ఉండే వృక్షాల పరపరాగ సంపర్కానికి తోడ్పడతాయి.
* జపాన్, ఫ్రాన్స్ లాంటి దేశాలు వీటి నుంచి విద్యుత్ను ఉత్పత్తి చేస్తున్నాయి. దీన్ని టైడల్ ఎనర్జీ అంటారు.
* ఈ ఎనర్జీని తయారుచేసిన తొలిదేశం ఫ్రాన్స్.
సునామీలు (Tsunamis)
* సునామీలు ఒక రకమైన సముద్ర తరంగాలు. వీటి వల్ల జననష్టం, ఆస్తినష్టం ఎక్కువగా జరుగుతుంది.
* సునామీ అంటే హార్బర్లో వచ్చే తరంగాలు.
* జపాన్ భాషలో ‘‘సు’’ (Su) అంటే రేవు, నామి (Nami) అంటే ‘‘అలలు’’.
* మహాసముద్ర అగాధాల్లో అతిపెద్ద భూకంపాలు సంభవించినప్పుడు, అగ్నిపర్వతాలు విస్ఫోటనం చెందినప్పుడు సముద్ర గర్భం నుంచి భయంకరమైన అలలు పుట్టుకొస్తాయి.
* ఇండోనేసియాలో క్రాకటోవా (Krakatao) అనే అగ్నిపర్వతం 1984లో సముద్రగర్భంలో పేలినప్పుడు అలలు 40 మీ.ల ఎత్తుకు లేచి తీర ప్రాంతాలను ముంచివేసింది.
* 2004లో ఇండోనేసియాలోని సుమత్రా దీవుల్లో సంభవించిన సునామీ తీవ్రత రిక్టర్ స్కేలుపై 8.9గా నమోదైంది. ఈ సునామీ అలల పొడవు 160 కి.మీ. వరకు ఉండగా, గంటకు 960 కి.మీ. వేగంతో పయనించి భారతదేశ తీరాన్ని చేరాయి.
* ఈ సునామీ ప్రారంభ ప్రాంతం హిందూ మహాసముద్రంలోని ‘సిమియూల్’. ఇది అండమాన్ నికోబార్ దీవులకు 125 కి.మీ., భారతదేశ తూర్పు తీరానికి 1920 కి.మీ. దూరంలో ఉంది.
* భారత్ను చేరిన ఈ సునామీ అలల ఎత్తు సుమారు 10 మీటర్లు.
* ఈ అలలు అండమాన్-నికోబార్ దీవులు, తమిళనాడు ప్రాంతాలనే కాకుండా సుమారు 12 దేశాల ప్రాంతాలను ధ్వంసం చేశాయి.
* మైదాన ప్రాంతంలో సునామీ వేగం గంటకు 50 కి.మీ. ఉంటుంది.
సముద్ర తరంగాలు - వర్గీకరణ
సముద్ర తరంగాల స్వరూప స్వభావాలను అధ్యయనం చేసిన తర్వాత వీటిని రెండు విధాలుగా వర్గీకరించవచ్చు. అవి
1్శ పురోగ తరంగాలు (Progressive waves)
2్శ స్థిరమైన తరంగాలు (Stationary waves)
* పురోగ తరంగంలోని నీటి కణాల కదలిక వలయాకారంలో (ఇంచుమించు గుండ్రంగా) ఉండగా, స్థిరమైన తరంగాల్లోని నీటి కణాలు శృంగం వద్ద ముందువైపునకు, ద్రోణి వద్ద వెనుక వైపునకు క్షితిజ సమాంతరంగా కదులుతూ ఉంటాయి.
* ఈ వర్గీకరణ సంతృప్తికరంగా లేకపోవడంతో సముద్ర తరంగాలను మరో రెండు రకాలుగా వర్గీకరించారు. అవి.
1) స్వేచ్ఛా తరంగాలు (Free waves)
2) శక్తిమంతమైన తరంగాలు (Forced waves)
స్వేచ్ఛా తరంగాలు
* నిర్మలంగా, నిశ్చలంగా ఉన్న ఒక తొట్టి నీళ్లలో ఒక చిన్న రాయిని వేసినప్పుడు గుండ్రంగా ఏర్పడే తరంగాలే స్వేచ్ఛా తరంగాలు.
* ఇవి తాపీగా, నిర్మలంగా ఉండి రింగులు రింగులుగా ఒకదాని వెంట మరొకటి పుట్టుకొస్తాయి. వీటి వల్ల అపాయం లేదు.
* ప్రాజెక్టులు కట్టినప్పుడు ఏర్పడే జలాశయాలు, పెద్ద చెరువులు, సరస్సులు మొదలైన వాటిలో ఈ రకమైన స్వేచ్ఛా తరంగాలను చూడవచ్చు.
శక్తిమంతమైన తరంగాలు
* వీటిని విధ్వంస తరంగాలు (Destructive waves) అంటారు. ఇవి చాలా పెద్దగా వస్తాయి. అపాయకరమైనవి.
* వీటివల్ల జన నష్టం, ఆస్తి నష్టం వాటిల్లే అవకాశం ఉంది.
* తీర ప్రాంతాలు క్రమక్షయానికి గురవుతాయి. పవనాల వల్ల, ప్రకృతి శక్తులైన భూకంపాలు, అగ్నిపర్వతాలు, తుపానులు తదితరాల వల్ల ఇవి ఆవిర్భవిస్తాయి.
* సునామీ శక్తిమంతమైన తరంగం.
పోటు - పాటుల ఆవిర్భావం గురించి తెలిపే సిద్ధాంతాలు
* ఈక్విలిబ్రియం సిద్ధాంతం - సర్ ఐజాక్ న్యూటన్
* డైనమికల్ సిద్ధాంతం - లాప్లాష్
* పురోగామి తరంగ సిద్ధాంతం - విలియం వేవెల్
* కెనాల్ సిద్ధాంతం - ఎయిరీ
* అచల తరంగ సిద్ధాంతం - హెరిస్
సముద్రంలోని నీరు ఎల్లప్పుడూ నిలకడగా ఉండకుండా కదులుతూ ఉంటుంది. ఈ కదలికలను మూడు రకాలుగా వర్గీకరించారు. అవి...
1) ప్రవాహాల రూపం 2) పోటు-పాటులు
3) తరంగాలు
* సముద్రంలోని నీరు పైన చెప్పిన విధంగా కదలడంతో భూగోళంపై ఏర్పడే అత్యల్ప, అత్యధిక ఉష్ణోగ్రతలు ఒకే దగ్గర కేంద్రీకృతం కావు. వాటి విస్తరణ ప్రకృతి సిద్ధంగా జరుగుతుంది.
రచయిత
పి.కె. వీరాంజనేయులు
విషయ నిపుణులు