• facebook
  • whatsapp
  • telegram

భౌతికశాస్త్ర బోధన ఉద్దేశాలు, విలువలు  

జీవితంలో చాలా సంవత్సరాల తరువాత సాధించగలిగే గమ్యాలను 'ఉద్దేశాలు' అంటారు.
* విజ్ఞానశాస్త్రం ఒక విషయ విభాగంగా అభ్యాసకుడిలో సర్వాంగీణ వికాస అభివృద్ధికి, సమాజంలో ఒక ఉత్తమ పౌరుడిగా తీర్చిదిద్దడానికి ఉపయోగపడుతుంది.
* విజ్ఞానశాస్త్రాన్ని అభ్యసించడం ద్వారా విద్యార్థి పొందే ప్రయోజనాలను, యోగ్యతలను తెలియపరిచేవే బోధనా విలువలు

 

ఉద్దేశాలు:
జ్ఞానవిషయాలను సముపార్జించడం: విజ్ఞానశాస్త్ర జ్ఞానం విద్యార్థి తన చుట్టూ ఉన్న ప్రపంచాన్ని అర్థం చేసుకునే విధంగా, దానికి తగిన రీతిలో మలుచుకునే విధంగా, అవసరమైతే దాన్ని మార్చేవిధంగా అందించడం.
అనుకూలమైన అలవాట్లను అభివృద్ధి చేయడం: నిజాయతీ, కష్టపడి పనిచేసే తత్వం, సహనం, నిష్పక్షపాత తీర్పు, పట్టుదల లాంటి ఉత్తమ అలవాట్లను పెంపొందించడం.
విద్యార్థుల్లో అభిరుచి, అభినందనలను అభివృద్ధి చేయడం: పత్రికలను చదవడం, సైన్స్ క్లబ్‌లను నిర్వహించడం, సైన్స్ ప్రదర్శనలను ఏర్పాటుచేయడం లాంటి కృత్యాలను ఇవ్వడం ద్వారా విద్యార్థుల్లో అభిరుచి, అభినందనలను అభివృద్ధిచేయడం.

శాస్త్రీయ వైఖరుల అభివృద్ధి: విశాలభావం, నిర్దిష్ట విజ్ఞానంలో ఆకాంక్ష, సమస్యా పరిష్కారజ్ఞానం లాంటి శాస్త్రీయ వైఖరుల ప్రవర్తనలను, ప్రత్యేక అభ్యసనానుభవాలు ప్రయోగశాలకృత్యాలు, సహపాఠ్యక్రమాల ద్వారా పెంపొందించే ఉద్దేశం.
నైపుణ్యాల, సామర్థ్యాల అభివృద్ధి: పటాలు గీయడం, రీడింగులు తీసుకోవడం, ప్రయోగాలు చేయడం, నమూనాలు తయారుచేయడం లాంటి నైపుణ్యాలను, సమస్యను గుర్తించడం, విశ్లేషించడం, వివరించడం, సాధారణీకరించడం లాంటి సామర్థ్యాలను అభివృద్ధి పరిచేది.
భావి జీవితానికి భూమిక: విద్యార్థులు శాస్త్ర విజ్ఞానానికి సంబంధించిన వృత్తులను లేదా ఉద్యోగాలను ఎన్నుకోవడానికి ఉపయోగపడేది.
విరామ సమయ సద్వినియోగ ఉద్దేశం: చార్టులు గీయడం, నమూనాలు తయారుచేయడం, పరికరాలను తయారుచేయడం లాంటి కృత్యాలను చేపట్టేవిధంగా విరామ సమయాన్ని సద్వినియోగం చేసుకోవాలి.
మానవ కల్యాణానికి భౌతికశాస్త్ర విజ్ఞానాన్ని వినియోగించడం: విద్యార్థులు ప్రతి సమస్యను శాస్త్రీయ పద్ధతిలో పరిష్కరించుకునేలా భౌతికశాస్త్ర జ్ఞానాన్ని ఉపయోగించుకోవాలి.
మంచి పౌరులుగా విద్యార్థులను తీర్చిదిద్దటం: విద్యార్థుల్లో మూఢనమ్మకాలను తొలగించి, శాస్త్రీయ వైఖరులను పెంపొందిస్తూ మంచి పౌరులుగా తీర్చిదిద్దాలి.

 

విజ్ఞానశాస్త్ర విలువలు
బౌద్ధిక విలువలు: విద్యార్థుల్లో అవగాహన, బుద్ధివికాసం, బుద్ధికుశలత, సత్యాన్వేషణ లాంటి బౌద్ధిక అంశాలను అభివృద్ధి చేస్తుంది.

ఉపయోగిత విలువలు: నిత్యజీవితంలో అవసరాలైన ఆహార, వైద్య, ఆరోగ్య, ఆర్థిక, వ్యాపార మొదలైన రంగాలన్నింటిలో విజ్ఞానశాస్త్రాన్ని ఉపయోగించుకోవడం.
వృత్తి విలువలు: భవిష్యత్తులో అనేక అంశాల్లో, వివిధ రకాలైన వృత్తులను ఎన్నుకునే విధంగా చేసి, స్వయంగా తమ భవిష్యత్తును నిర్మించుకోవడానికి ఉపయోగపడేది.
సాంస్కృతిక విలువలు: సాంస్కృతిక వికాసానికి, దోహదపడే అంశాలైన ఆచార వ్యవహారాలు, కట్టుబాట్లు, ఆహార అవసరాలు, ఆలోచనా విధానంలో మార్పులు తీసుకురావడంతో పాటు, సాంస్కృతిక వారసత్వాన్ని నూతనతరాలకు అందించే విలువలు.
నైతిక విలువలు: నిజాయతీ, నిష్కపటం, నిష్పాక్షికంగా ఉండటం, నిర్భయం, నిస్వార్థం, ఓర్పు లాంటి నైతిక విలువలు పెంపొందించడం.
సౌందర్యాత్మక విలువలు: సృష్టిలోని విషయాలన్నింటిలో సౌష్టవం, సౌందర్యం, మృదుత్వం, రమణీయతలను పరిశీలించి, వాటిలో ఉన్న క్రమాన్ని, అమర్చిన విధానాన్ని చూసి అభినందిస్తూ, విలువలను పెంపొందించుకోవాలి.
క్రమశిక్షణ విలువలు: ప్రయోగశాలల్లో పనిచేయడం, రీడింగులను తీసుకోవడం, నమూనాలు తయారుచేయడం లాంటి పనుల ద్వారా క్రమశిక్షణ విలువలను పెంపొందించడం.
ఉత్తేజాన్ని కలిగించే విలువలు: శాస్త్రజ్ఞుల జీవిత చరిత్రలను చదవడం, వినడం ద్వారా శాస్త్ర పఠనం పట్ల ఆసక్తిని, ఉత్తేజాన్ని కలిగించడం.

విరామసమయ వ్యాపక విలువలు: విజ్ఞానశాస్త్ర పత్రికలు చదవడం, దినపత్రికల్లో, వార్తాపత్రికల్లో వచ్చే శాస్త్ర సంబంధమైన విషయాలను సేకరించడం, వివిధ నమూనాలు తయారుచేయడం లాంటి పనులద్వారా విరామ సమయ వ్యాపక విలువలను పెంపొందించడం.
శాస్త్రీయ వైఖరుల అభివృద్ధి విలువలు: లక్ష్యాత్మకత, హేతుబద్ధత, రుజుప్రవర్తన, నిశిత పరిశీలనలు, వినయం, అణకువ లాంటి శాస్త్రీయ వైఖరులను అభివృద్ధిపరిచే విలువలు.
సృజనాత్మక విలువలు: విద్యార్థుల్లో సృజనాత్మకతను పెంపొందించే విలువలు.
ఉన్నత విద్యకు, జీవితానికి భూమిక: విజ్ఞానశాస్త్రం ద్వారా విద్యార్థుల భావిజీవితానికి కావాల్సిన విద్యను, పరిశోధనలు చేపట్టడానికి ఉపయోగపడుతుంది.


 

Posted Date : 04-03-2021

గమనిక : ప్రతిభ.ఈనాడు.నెట్లో వచ్చే ప్రకటనలు అనేక దేశాల నుండి, వ్యాపారస్తులు లేదా వ్యక్తుల నుండి వివిధ పద్ధతులలో సేకరించబడతాయి. ఆయా ప్రకటనకర్తల ఉత్పత్తులు లేదా సేవల గురించి ఈనాడు యాజమాన్యానికీ, ఉద్యోగస్తులకూ ఎటువంటి అవగాహనా ఉండదు. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సు సాంకేతికతతో పంపబడతాయి. ఏ ప్రకటనని అయినా పాఠకులు తగినంత జాగ్రత్త వహించి, ఉత్పత్తులు లేదా సేవల గురించి తగిన విచారణ చేసి, తగిన జాగ్రత్తలు తీసుకొని కొనుగోలు చేయాలి. ఉత్పత్తులు / సేవలపై ఈనాడు యాజమాన్యానికి ఎటువంటి నియంత్రణ ఉండదు. కనుక ఉత్పత్తులు లేదా సేవల నాణ్యత లేదా లోపాల విషయంలో ఈనాడు యాజమాన్యం ఎటువంటి బాధ్యత వహించదు. ఈ విషయంలో ఎటువంటి ఉత్తర ప్రత్యుత్తరాలకీ తావు లేదు. ఫిర్యాదులు తీసుకోబడవు.

 

పేపర్ - II

పాత ప్రశ్నప‌త్రాలు

 

విద్యా ఉద్యోగ సమాచారం

 

నమూనా ప్రశ్నపత్రాలు

 

లేటెస్ట్ నోటిఫికేష‌న్స్‌