4000 సంవత్సరాల పూర్వం ఆసియా మైనరు ప్రాంతంలో మెగ్నీషియా అనే ప్రాంతంలో కొన్ని రాళ్లకు ఆకర్షణ ధర్మం ఉందని గుర్తించారు. దీనికి మాగ్నటిజం అని పేరు పెట్టారు. మొదట అయస్కాంతత్వాన్ని గురించి తెలిపినవారు గ్రీకులు. వేదాల్లో అయస్కాంతాన్ని చుంబకం అని అంటారు.
* క్రీ.పూ.2000లో చైనీయులు అయస్కాంత ధర్మాలను తెలుసుకున్నారు.
* క్రీ.శ.1100లో చైనీయులు దిక్సూచీని కనుక్కుని సముద్రయానం చేసి ఉత్తర - దక్షిణ దిక్కులను తెలుసుకోగలిగారు.
* భూమి పెద్ద అయస్కాంతమని 1600లో 'విలియం గిల్బర్ట్' అనే శాస్త్రవేత్త Det Magnet అనే పుస్తకం ద్వారా తెలియజేశారు.
* ఏదైనా ఒక పదార్థంలో పరమాణు ఎలక్ట్రాన్లు ఒక క్రమమైన పద్ధతిలో అమరి ఉన్నట్లయితే కలిగే ఆకర్షణ శక్తిని అయస్కాంతత్వం అంటారు.
* ఈ ధర్మం ప్రదర్శించే వాటిని అయస్కాంతాలు అంటారు.
అయస్కాంతత్వ పదార్థాలు - రకాలు:
* అయస్కాంతత్వం దృష్ట్యా ప్రకృతిలోని పదార్థాలను రెండు రకాలుగా వర్గీకరించారు.
1. అయస్కాంత పదార్థాలు
2. అనయస్కాంత పదార్థాలు
1. అయస్కాంత పదార్థాలు:
ప్రకృతిలో ఏ పదార్థాలు అయితే అయస్కాంతంతో ఆకర్షించబడతాయో వాటిని అయస్కాంత పదార్థాలు అంటారు.
ఉదా: ఇనుము, ఉక్కు, కోబాల్ట్....
2. అనయస్కాంత పదార్థాలు:
ప్రకృతిలో అయస్కాంతంతో ఆకర్షించబడని పదార్థాలను అనయస్కాంత పదార్థాలు అంటారు.
ఉదా: చెక్క, గాజు, ప్లాస్టిక్...
అయస్కాంతాలు - రకాలు
అయస్కాంతాలు రెండు రకాలు
1. సహజ అయస్కాంతాలు
2. కృత్రిమ అయస్కాంతాలు
1) సహజ అయస్కాంతాలు:
ప్రకృతిలో సహజసిద్ధంగా లభించే ఆకర్షణ ధర్మం ఉన్న ఖనిజాలు, రాళ్లను సహజ అయస్కాంతాలు అంటారు.
ఉదా: మాగ్నటైట్, భూమి...
* ఇవి బలహీనంగా ఉంటాయి.
* ఇవి క్రమరహిత ఆకారంలో ఉంటాయి.
* వీటి శక్తి చాలా తక్కువ.
2) కృత్రిమ అయస్కాంతాలు:
సహజ అయస్కాంతాలతో ఇనుము లేదా ఉక్కు కడ్డీలను సరైన పద్ధతిలో రుద్దడం వల్ల కృత్రిమ అయస్కాంతాలు ఏర్పడతాయి.
ఉదా: దండాయస్కాంతం, స్తూపాకార అయస్కాంతం, గుర్రపునాడ అయస్కాంతం...
* వీటి అయస్కాంతత్వం సహజ అయస్కాంతాల కంటే ఎక్కువ.
* ఇవి బలంగా ఉంటాయి. క్రమ ఆకారాన్ని కలిగి ఉంటాయి.
* సహజ అయస్కాంతాల కంటే కృత్రిమ అయస్కాంతాలకు శక్తి ఎక్కువ.
అయస్కాంత పదార్థాలు - ధర్మాలు:
1. ఆకర్షణ ధర్మం
2. దిశా ధర్మం
3. అయస్కాంత ధ్రువాల సిద్ధాంతం
4. ధ్రువాల జంట నియమం
1. ఆకర్షణ ధర్మం:
* అయస్కాంతం కొనల వద్ద ఆకర్షణ ధర్మం అధికంగా ఉంటుంది.
* అయస్కాంతం శక్తి అంతా దాని కొనల వద్ద కేంద్రీకృతమై ఉంటుంది.
* అయస్కాంత మధ్య బిందువు వద్ద అయస్కాంతత్వం శూన్యం.
2. దిశా ధర్మం:
* ఒక అయస్కాంతాన్ని స్వేచ్ఛగా వేలాడదీస్తే, అది ఎల్లప్పుడూ భూమి ఉత్తర, దక్షిణ ధ్రువాలను సూచిస్తుంది. దీన్నే దిశా ధర్మం అని అంటారు.
* ప్రతి అయస్కాంతం రెండు ధ్రువాలను కలిగి ఉంటుంది. ఒకటి ఉత్తర ధ్రువం, మరొకటి దక్షిణ ధ్రువం.
* N - N, S - Sలను సజాతి ధ్రువాలు అంటారు.
* దిక్సూచీ దిశాధర్మం ఆధారంగా పనిచేస్తుంది.
3. అయస్కాంత ధ్రువాల సిద్ధాంతం:
సజాతి ధ్రువాలు వికర్షించుకుంటాయి. విజాతి ధ్రువాలు ఆకర్షించుకుంటాయి. దీన్ని అయస్కాంత ధ్రువాల సిద్ధాంతం అంటారు.
4. ధ్రువాల జంట నియమం:
* అయస్కాంత ధ్రువాలు జంటగా ఉంటాయి. వాటిని విడదీయలేం. ఏక ధ్రువాలు విడిగా ఉండలేవు దీన్నే ధ్రువాల జంట నియమం అంటారు.
* అయస్కాంతాన్ని ఎన్ని ముక్కలుగా విభజించినా ప్రతి ముక్క రెండు ధ్రువాలున్న ఒక అయస్కాంతంలా ప్రవర్తిస్తుంది.
అయస్కాంత ప్రేరణం:
అయస్కాంతం ఇనుము, నికెల్, ఉక్కు లాంటి పదార్థాల్లో అయస్కాంతత్వాన్ని ప్రేరేపిస్తుంది. దీన్ని అయస్కాంత ప్రేరణ అంటారు.
i) ఏక స్పర్శ పద్ధతి:
అయస్కాంతీకరించాల్సిన కడ్డీని ఒక దండాయస్కాంతానికి చెందిన ఒక ధ్రువంతో ఒకే దిశలో పలుమార్లు రుద్దితే కడ్డీ అయస్కాంతంలా మారుతుంది.
ii) ద్విస్పర్శ పద్ధతి:
అయస్కాంతీకరించాల్సిన కడ్డీని రెండు దండాయస్కాంతాలతో పరస్పరం వ్యతిరేక దిశలో పలుమార్లు రుద్దితే అయస్కాంతంగా మారుతుంది.
iii) విద్యుత్ పద్ధతి:
సురక్షిత రాగి తీగను అయస్కాంతీకరించాల్సిన కడ్డీ చుట్టూ చుట్టి ఏకముఖ విద్యుత్ పంపితే అది అయస్కాంతంగా మారుతుంది.
అయస్కాంత క్షేత్రం:
అయస్కాంతం చుట్టూ దాని ప్రభావం ఉండే ప్రదేశాన్ని అయస్కాంత క్షేత్రం అంటారు.
లేదా
అయస్కాంతాన్ని ఆవరించిన అంతరాళంలో ఎంత వరకు దాని ప్రభావం ఉంటుందో దాన్ని అయస్కాంత క్షేత్రం అంటారు.
* అయస్కాంత క్షేత్రంలో ఒక బిందువు వద్ద ప్రమాణ ధ్రువంపై ఎంత బలం ఉంటుందో దాన్ని ఆ బిందువు వద్ద అయస్కాంత క్షేత్ర తీవ్రత అంటారు. దీన్ని Bతో సూచిస్తారు. దీనినే అయస్కాంతక్షేత్ర ప్రేరణ అని కూడా అంటారు.
అయస్కాంత క్షేత్ర ప్రమాణం టెస్లా (T) లేదా Wb/m2
కూలుంబ్ విలోమ వర్గ నియమం:
ఏవైనా రెండు అయస్కాంత ధ్రువాల మధ్య ఉన్న ఆకర్షణ లేదా వికర్షణ బలం ఆ రెండు ధ్రువసత్వాల లబ్ధానికి అనులోమానుపాతంలో, వాటి మధ్య ఉన్న దూర వర్గానికి విలోమానుపాతంలో ఉంటుంది. దీన్నే కూలుంబ్ విలోమ వర్గ నియమం అంటారు.
అయస్కాంత ప్రవేశ్యశీలత:
ఒక యానకం తన ద్వారా అయస్కాంత బలరేఖలను ప్రవేశింపజేసే స్వభావాన్ని లేదా తాను అయస్కాంతక్షేత్ర స్వభావానికి లోనయ్యే స్వభావాన్ని ఆ యానకపు ప్రవేశ్యశీలత అంటారు.
శూన్యం ప్రవేశ్యశీలత μ0 = 4π × 10-7 హెన్రీ/మీటరు
అయస్కాంత బలరేఖలు:
* అయస్కాంత క్షేత్రంలోకి ప్రమాణ ఉత్తర ధ్రువం అనుసరించే పథాన్ని అయస్కాంత బలరేఖ అంటారు. ఇవి ఊహారేఖలు మాత్రమే.
* అయస్కాంత బలరేఖలు ఖండించుకోవు.
* ఒంటరి ఉత్తర ధ్రువానికి చెందిన బలరేఖలు వికేంద్రీకరణ చెంది ఉంటాయి.
* ఒంటరి దక్షిణ ధ్రువానికి చెందిన బలరేఖలు కేంద్రీకరణం చెంది ఉంటాయి.
* దండాయస్కాంత బలరేఖలు అయస్కాంతం బయట ఉత్తర ధ్రువం నుంచి దక్షిణ ధ్రువం వైపు వక్రరేఖలుగా; అయస్కాంతం లోపల దక్షిణధ్రువం నుంచి ఉత్తర ధ్రువానికి సమాంతర సరళరేఖలుగా ఉంటాయి.
* అయస్కాంత ఉత్తర, దక్షిణ ధ్రువాల మధ్య ఉండే కనిష్ఠ దూరాన్ని అయస్కాంత పొడవు అంటారు. దీనిని 2l తో సూచిస్తారు.
* అయస్కాంతంలో ఉత్తర, దక్షిణ ధ్రువాల్లోని ఆకర్షణ బలాన్ని ధ్రువసత్వం అంటారు.
* ధ్రువసత్వం అదిశరాశి.
* ధ్రువసత్వం SI ప్రమాణాలు - ఆంపియర్.మీటరు.
* అయస్కాంత ధ్రువసత్వం, అయస్కాంత పొడవుల లబ్ధాన్ని అయస్కాంత భ్రామకం అంటారు.
M = 2l × m = 2lm
అయస్కాంత భ్రామకం SI ప్రమాణం - ఆపింయర్.మీటరు
* ఒక A.m ధ్రువసత్వం గల ప్రమాణ ఉత్తర ధ్రువం వైపు పనిచేసే బలాన్ని అయస్కాంత క్షేత్ర తీవ్రత అంటారు.
H=F/M
దీని ప్రమాణాలు - న్యూటన్/ ఆంపియర్.మీటరు
C.G.S. పద్ధతిలో ప్రమాణం - ఆయిర్స్టెడ్
అయస్కాంత పదార్థాల ముఖ్య ధర్మాలు:
1. అయస్కాంత ప్రవేశ్యశీలత
2. ససెప్టిబిలిటి
3. రిటెంటివిటి
4. అయస్కాంతీకరణ తీవ్రత
1. అయస్కాంత ప్రవేశ్యశీలత:
ఒక యానకం తన ద్వారా అయస్కాంత బలరేఖలను ప్రవేశింపజేసే స్వభావాన్ని లేదా తాను అయస్కాంతక్షేత్ర స్వభావానికి లోనయ్యే స్వభావాన్ని ఆ యానకపు ప్రవేశ్యశీలత అంటారు.
శూన్యం ప్రవేశ్యశీలత μ0 = 4π × 10-7 హెన్రీ/ మీటరు
2. ససెప్టిబిలిటి:
ఒక పదార్థం అయస్కాంతీకరణ తీవ్రత (I), అయస్కాంతక్షేత్ర తీవ్రత (H)ల నిష్పత్తిని ససెప్టిబిలిటి అంటారు.
3. రిటెంటివిటి:
అయస్కాంత పదార్థాన్ని నిరయస్కాంతీకరణ చేసినప్పుడు మిగిలి ఉన్న అయస్కాంత స్వభావాన్ని రిటెంటివిటి అంటారు.
దీనికి ప్రమాణాలు లేవు.
4. అయస్కాంతీకరణ తీవ్రత:
ప్రమాణ ఘనపరిమాణం ఉండే పదార్థంలోని అయస్కాంత భ్రామకాన్ని అయస్కాంతీకరణ తీవ్రత (I) అంటారు.
దీని SI ప్రమాణం - ఆంపియర్/మీటరు.
నిరయస్కాంతీకరణం:
* అయస్కాంతాన్ని రబ్బరు సుత్తితో మోదడం, వేడిచేయడం.
* ఏకాంతర విద్యుత్ (AC కరెంట్) పంపడం ద్వారా అయస్కాంత పదార్థాన్ని అనయస్కాంత పదార్థంగా మారుస్తారు.
భూమి - అయస్కాంతత్వం:
ఒక ప్రదేశంలోని భూ అయస్కాంతాన్ని నిర్ణయించే రాశులను భూ అయస్కాంత మూలరాశులు అంటారు.
దిక్పాతం:
ఒక ప్రదేశంలో భూగోళ, అయస్కాంత యామ్యోత్తర రేఖల మధ్య కోణాన్ని దిక్పాతం అంటారు.
అవపాతం:
ఒక అయస్కాంత క్షేత్రం ఫలిత తీవ్రత దిశ (I) కు, క్షితిజ సమాంతర దిశకు మధ్య ఉండే కోణాన్ని ఆ ప్రదేశంలో అవపాతం అంటారు.
అయస్కాంతాలు - ఉపయోగాలు:
* భూఅయస్కాంత మూలరాశులు, దిక్పాతం, అవపాతం, క్షితిజాంశాలను విమానయానం, నౌకాయానంలో ఉపయోగిస్తారు.
* శక్తిమంతమైన విద్యుదయాస్కాంతాలను ఎలక్ట్రిక్ క్రేన్లలో బరువులను ఎత్తడానికి ఉపయోగిస్తారు.
* టెలిఫోన్, టెలిగ్రాఫ్ రిసీవర్లలో వాడతారు.
* అయస్కాంత థర్మామీటర్ల తయారీకి (దీన్ని ఉపయోగించి పరమశూన్య ఉష్ణోగ్రతను కొలుస్తారు).
* సాధారణ రాళ్ల నుంచి ఖనిజాలను వేరుచేయడానికి అయస్కాంతత్వాన్ని ఉపయోగిస్తారు. దీన్ని అయస్కాంత విభజన అంటారు.
* మానవ శరీరంలోని కణజాలాల్లోని లోపాలను గుర్తించడానికి ఉపయోగిస్తారు.
* దిక్సూచీగా వినియోగిస్తారు.
* అయస్కాంతాలను ఉపయోగించి మానసిక పరిపక్వత సాధించే ప్రక్రియను మాగ్నటో థెరఫి అంటారు.
అయస్కాంత పదార్థాలు వర్గీకరణ:
ఆకర్షించే స్వభావాన్ని బట్టి అయస్కాంత పదార్థాలను మూడు రకాలుగా వర్గీకరించారు.
1) డయా అయస్కాంత పదార్థాలు
2) పారా అయస్కాంత పదార్థాలు
3) ఫెర్రో అయస్కాంత పదార్థాలు
1) డయా అయస్కాంత పదార్థాలు:
* వీటి ఫలిత అయస్కాంత భ్రామకం శూన్యం.
* ఇవి అయస్కాంత క్షేత్రంలో వికర్షించబడతాయి.
* వీటి సాపేక్ష ప్రవేశ్యశీలత ఒకటి లేదా అంతకంటే తక్కువ μr ≤ 1.
* వీటి ససెప్టిబిలిటి చాలా తక్కువ, రుణాత్మకం
ఉదా: బంగారం, ఆల్కహాల్, గాలి, నీరు, బిస్మత్...
2) పారా అయస్కాంత పదార్థాలు:
* వీటి ఫలిత అయస్కాంత భ్రామకం శూన్యంకాదు.
* ఇవి అయస్కాంతక్షేత్రంలో పాక్షికంగా ఆకర్షించబడతాయి.
* వీటి సాపేక్ష ప్రవేశ్యశీలత ఒకటి కంటే ఎక్కువ. μr > 1
* ససెప్టిబిలిటి విలువలు తక్కువ, ధనాత్మకం.
ఉదా: అల్యూమినియం, ప్లాటినం, క్రోమియం, ఆక్సిజన్, నికెల్...etc..
3) ఫెర్రో అయస్కాంత పదార్థాలు
* ప్రతి పరమాణువులోని ఫలిత అయస్కాంత భ్రామకం బాహ్య అయస్కాంత క్షేత్ర దిశకు సమాంతరంగా సర్దుకుని స్వచ్ఛంద అయస్కాంతీకరణ ధర్మాలను ప్రదర్శించే పదార్థాలను ఫెర్రో అయస్కాంత పదార్థాలు అంటారు.
* వీటి సాపేక్ష ప్రవేశ్యశీలత చాలా ఎక్కువ. μr > > > 1
* వీటి ససెప్టిబిలిటి చాలా ఎక్కువ, ధనాత్మకం.
* ఇవి డొమైన్ సిద్ధాంతాన్ని పాటిస్తాయి.
ఉదా: ఇనుము, నికెల్, కోబాల్ట్, ఉక్కు, గెడలోనియం, డిస్ప్రోసియం...