అవ్యక్త భావనలను పసిగడితే మార్కులు!
ఏదైనా సమాచారాన్ని విమర్శనాత్మకంగా విశ్లేషించడానికి, తగిన తార్కిక ప్రతిపాదనలు చేయడానికి ముందుగా దానిని అర్థం చేసుకోగలగాలి. అప్పుడే సరైన వాదనలు చేయడానికి, సమస్యలను పరిష్కరించడానికి సాధ్యమవుతుంది. ఆ విధమైన సామర్థ్యాలను అంచనా వేయడానికి రీజనింగ్లో భాగంగా ‘ప్రకటనలు - ఊహలు’ పాఠ్యభాగం నుంచి ప్రశ్నలు అడుగుతారు. అందులోని ప్రకటనల నుంచి అంతర్లీనంగా, అవ్యక్తంగా ఉన్న భావాలను అభ్యర్థులు గ్రహించాలి. ఇచ్చిన ఊహల్లో సరిపోయే వాటిని గుర్తించాలి. ఈ ప్రశ్నలను వీలైనంత ఎక్కువ ప్రాక్టీస్ చేస్తే ఆలోచనలు పదునెక్కుతాయి. మార్కులూ దక్కుతాయి.
ప్రశ్నలో భాగంగా ఒక ప్రకటన, ఊహలు (భావించిన అంశాలు) ఇస్తారు. ప్రకటన అనేది ఎందుకు ఇచ్చారో ఊహించాలి. దీని ద్వారా ఏ ఊహ బలంగా ఉందో చెప్పగలగాలి. ఊహ (భావించిన అంశం) - 1 బలంగా ఉంటే సమాధానం ‘ఎ’గా, ఊహ- 2 బలంగా ఉంటే సమాధానం ‘బి’గా, రెండూ బలంగా లేకపోతే సమాధానం ‘సి’గా, రెండు ఊహలు బలంగా ఉంటే సమాధానం ‘డి’గా గుర్తించాలి.
మాదిరి ప్రశ్నలు
1. ప్రకటన: నీకు ఏదైనా సమస్య ఉంటే నా వద్దకు రా!
ఊహలు: (భావించిన అంశాలు):
1) నీకు కొన్ని సమస్యలు ఉన్నాయి.
2) నేను ఏ సమస్యనైనా తీర్చగలను.
సమాధానం: బి
ఇక్కడ నీకు ‘ఏదైనా’ సమస్య ఉంటే నా వద్దకు రా. అంటే ‘నేను ఏ విధమైన సమస్యనైనా పరిష్కరించగలుగుతాను’. అని అర్థం కాబట్టి ఆ ప్రకటన చేయడానికి కారణం ఊహ(భావించిన అంశం)-2 సరైంది.
2. ప్రకటన: ఆడిటోరియంలో ‘మొబైల్ ఫోన్ వాడటం నిషిద్ధం. ఒకవేళ మీవద్ద ఉంటే దయచేసి స్విచ్ఆఫ్ చేయండి’. అని నోటీసు బోర్డుపై రాసి ఉంది.
ఊహలు:
1) సాధారణంగా ఆడిటోరియంలోనికి వచ్చే ముందు మొబైల్ ఫోన్తో రారు.
2) మొబైల్ ఫోన్ ఉన్నవారు ఆ ప్రకటన ద్వారా చేసిన ఆజ్ఞను పాటిస్తారు.
సమాధానం: బి
3. ప్రకటన: ఈ విజయం తర్వాత కూడా ఒదిగి ఉండు.
ఊహలు:
1) విజయం తర్వాత చాలామంది ఒదిగి ఉంటారు.
2) విజయం తర్వాత ప్రజలు సహజంగా ఒదిగి ఉండరు.
సమాధానం: బి
1. ప్రకటన: పొగతాగడం మానేస్తే, బరువు పెరుగుతారు.
ఊహలు:
1) పొగతాగడం మానినవారు బరువు పెరుగుతారు.
2) పొగతాగడం మాననివారు బరువు పెరగరు.
2. ప్రకటన: ‘నువ్వు ఏదైనా ప్రకటన ఇవ్వదలిస్తే న్యూస్పేపర్ x లో ఇవ్వు’ అని A, B తో అన్నాడు.
ఊహలు:
1) B తన ఉత్పత్తులకు ప్రకటన ఇవ్వాలనుకున్నాడు.
2) న్యూస్పేపర్ x కి మంచి పాఠకాదరణ ఉంది.
3. ప్రకటన: అతడు జ్ఞానవంతుడైతే పరీక్ష తప్పక ఉత్తీర్ణుడవుతాడు.
ఊహలు:
1) ఉత్తీర్ణుడు అవడానికి తప్పక జ్ఞానవంతుడు కావాలి.
2) అతడు ఉత్తీర్ణుడవుతాడు.
4. ప్రకటన: ‘అతిథులకు మధ్యాహ్న భోజనం ఏర్పాటు చేయడమైంది’. అని A,B తో చెప్పాడు.
ఊహలు:
1) అతిథులకు ఈ విషయం చెప్పకపోతే భోజనం చేయరు.
2) అతిథులు భోజన సమయానికి ఉంటారు.
5. ప్రకటన: అన్ ఎయిడెడ్ కాలేజీల్లో ఫీజులను ప్రభుత్వం పెంచుకోనివ్వాలి.
ఊహలు:
1) అన్-ఎయిడెడ్ కాలేజీలు ఆర్థిక సమస్యలో ఉన్నాయి.
2) ఎయిడెడ్ కాలేజీలు ఫీజులు పెంచాల్సిన అవసరం లేదు.
6. ప్రకటన: పాఠశాల స్థాయిలో కంప్యూటర్ విద్యను ప్రవేశపెట్టాలి.
ఊహలు:
1) కంప్యూటర్ నేర్చుకోవడం సులభం.
2) కంప్యూటర్ విద్య ద్వారా ఉద్యోగాలు సాధించడం సులభం.
7. ప్రకటన: కంప్యూటర్ రంగంలో మేం అత్యంత నాణ్యమైన శిక్షణను అందిస్తున్నాం.
ఊహలు:
1) కంప్యూటర్ ట్రైనింగ్ పొందడానికి ప్రజలు ఆసక్తి చూపుతున్నారు.
2) ప్రజలు అత్యంత నాణ్యమైన శిక్షణను కోరుకుంటారు.
8. ప్రకటన: ‘నేను లేనప్పుడు నా సంస్థ వ్యవహారాలన్నీ నువ్వే చూసుకో.’ అని ఎ, బి తో చెప్పాడు. ఊహలు:
1) ఎ ప్రతిపాదనను బి అంగీకరించాడు.
2) సంస్థను బి చక్కగా నిర్వహించగలడు కాబట్టి.
9. ప్రకటన: దుస్తులను శుభ్రపరచడానికి సబ్బు వాడాలి.
ఊహలు:
1) సబ్బు మరకలను సృష్టిస్తుంది.
2) సబ్బు గ్రీజు, మురికిని పోగొట్టడానికి ఉపయోగపడుతుంది.
10. ప్రకటన: మున్సిపాలిటీవారు కొత్తగా ప్రవేశపెట్టిన ‘కీప్ యువర్ సిటీ క్లీన్’ అనే పథకాన్ని పట్టణ వాసులు పెద్దగా పట్టించుకోలేదు.
ఊహలు:
1) ప్రజలు తమ పట్టణాన్ని పరిశుభ్రంగా ఉంచుకోవాలని అనుకోవడం లేదు.
2) మున్సిపాలిటీ సిబ్బంది పథకం ఆచరణలో విఫలమయ్యారు.
11. ప్రకటన: దేశంలో 18 సంవత్సరాలు దాటిన యువతకు నిరుద్యోగభృతి కల్పించాలి.
ఊహలు:
1) దేశంలో ఆర్థిక భరోసా లేని నిరుద్యోగులు ఉన్నారు.
2) దేశంలోని నిరుద్యోగులందరికీ భృతి కల్పించడానికి ప్రభుత్వం వద్ద డబ్బు ఉంది.
12. ప్రకటన: ‘వర్తమాన విషయాల కోసం నేను రోజూ రాత్రి 9 గంటలకు రేడియో వార్తలు వింటాను.’ అని ఒక వ్యక్తి తన ఇంటర్వ్యూలో చెప్పాడు.
ఊహలు:
1) ఆ వ్యక్తి దినపత్రిక చదవడం లేదు.
2) వర్తమాన వార్తలు రేడియోలో మాత్రమే ప్రసారం చేస్తున్నారు.
13. ప్రకటన: గత అయిదేళ్లలో ఇండియాలో ఎయిర్ట్రాఫిక్ చాలా పెరిగింది.
ఊహలు:
1) విమానాల్లో ప్రయాణించడం ఈ రోజుల్లో ఒక గొప్పతనంగా భావిస్తున్నారు.
2) చాలామంది విమానాల్లో ప్రయాణానికి అయ్యే ఖర్చును సులభంగా భరించగలుగుతున్నారు.
14. ప్రకటన: మీ వస్తువులను కప్బోర్డులో తాళంవేసి ఉంచండి. అందరినీ మర్యాదపూర్వకంగా పలకరించండి.
ఊహలు:
1) కప్బోర్డులో తాళం వేసిన వస్తువులు దొంగతనం చేయరు.
2) దొంగతనం ఒక నేరం.
15. ప్రకటన: ఈ నెల చివరికల్లా ‘వర్షాలు కురవకపోతే, చాలామంది రైతులు ఈ సంవత్సరంలో కష్టాల్లో పడతారు.
ఊహలు:
1) సరైన వర్షాలు, సరైన సమయంలో వ్యవసాయానికి చాలా అవసరం.
2) సాధారణంగా చాలామంది రైతులు వర్షాలపై ఆధారపడతారు.
16. ప్రకటన: దేశ ఆర్థిక స్థితి విచారకరమైన స్థితి నుంచి మరింత అధ్వానంగా మారింది.
ఊహలు:
1) ప్రభుత్వం ఆర్థిక సమస్యలను పరిష్కరించడంలో విఫలమైంది.
2) ప్రజలు, ప్రభుత్వానికి సహకరించడం లేదు.
17. ప్రకటన: మీరు ఒకవేళ ఎస్ఐ అయితే, మీరు తీర్చాల్సిన ఒక సమస్య మాకు ఉంది.
ఊహలు:
1) మాకు ఒక ఎస్ఐ అవసరం ఉంది.
2) మీరొక ఎస్ఐ.
18. ప్రకటన: ‘కార్యక్రమం మధ్యాహ్నం 3 గంటలకు ప్రారంభిస్తారు. ఆ సమయాని కంటే ముందే మీరు మీ సీట్లలో ఉండాలి.’ అని ఒక ఆహ్వాన పత్రికలో ఉంది.
ఊహలు:
1) ఒకవేళ ఆహ్వానితుడు ( పిలుపు అందుకున్న వ్యక్త్శి) 3 గంటలకు ముందే తన సీటులో లేకపోతే, ఆ కార్యక్రమం ప్రారంభం కాదు.
2) కార్యక్రమం యధావిధిగా అనుకున్న సమయానికి ప్రారంభమవుతుంది.
19. ప్రకటన: ‘మా బూట్లు ఎస్ఐలకు మాత్రమే’ అని ఒక షాపు ప్రకటనలో ఉంది.
ఊహలు:
1) చాలామందికి ఎస్ఐ కావాలని ఉంటుంది.
2) ఆ బూట్లు వేసుకోనంతవరకు ఒక వ్యక్తి ఎస్ఐ కాలేడు.
20. ప్రకటన: క్లబ్లోనికి ప్రవేశించే ముందు ఈ గమనిక చదవండి.
ఊహలు:
1) ప్రజలు అక్షరాస్యులు.
2) అంధులు క్లబ్లోకి ప్రవేశించలేరు.
సమాధానాలు: 1-సి; 2-బి; 3-ఎ; 4-బి; 5-ఎ; 6-ఎ; 7-డి; 8-బి; 9-బి; 10-డి; 11-ఎ; 12-సి; 13-బి; 14-ఎ; 15-డి; 16-ఎ; 17-ఎ; 18-బి; 19-ఎ; 20-డి.
రచయిత: గోలి ప్రశాంత్ రెడ్డి