‣ 452 ఖాళీలతో ప్రకటన
‣ ప్రిపరేషన్ ప్రణాళిక
బ్యాంకుల్లో సాధారణ బ్యాంకింగ్ విధులతోపాటు ప్రత్యేకమైన కారక్యకలాపాల కోసం స్పెషలిస్ట్ కేడర్ ఉద్యోగులు ఉంటారు. మార్కెటింగ్, ఐటీ, సిస్టమ్స్, సెక్యూరిటీ, క్రెడిట్ ప్రొసీజర్స్, ఇంటర్నల్ ఆడిట్ తదితర విభాగాల్లో వీరు పనిచేస్తుంటారు. వినియోగదారుడికి అందించే సేవలను సులభతరం చేయడంతోపాటు, లావాదేవీలను సౌకర్యవంతం చేయడం స్పెషలిస్ట్ కేడర్ ఉద్యోగుల ప్రధాన లక్ష్యం. ఈ ఖాళీల భర్తీకి ఏటా నోటిఫికేషన్లు వెలువడుతుంటాయి.
ప్రస్తుతం దేశంలో అతిపెద్ద బ్యాంక్ అయిన స్టేట్ బ్యాంక్ ఆఫ్ ఇండియా ఇలాంటి పోస్టుల్లో నియామకాల కోసం ప్రకటన విడుదల చేసింది. మొత్తం 452 ఖాళీలు ఉన్నాయి. సెంట్రల్ రిక్రూట్ మెంట్ అండ్ ప్రమోషన్ విభాగం ఈ నియామక ప్రక్రియను నిర్వహిస్తోంది.
ఎవరు అర్హులు?
‣ మేనేజర్, డిప్యూటీ మేనేజర్ (మార్కెటింగ్) ఉద్యోగాల కోసం దరఖాస్తు చేసే అభ్యర్థులు మార్కెటింగ్/ ఫైనాన్స్లో ఫుల్ టైం ఎంబీఏ/ పీజీడీఎం/ తత్సమాన డిగ్రీలో ఉత్తీర్ణులై ఉండాలి. మేనేజర్(మార్కెటింగ్) సంబంధిత ఫీల్డ్లో అయిదేళ్లు, డిప్యూటీ మేనేజర్ కనీసం రెండేళ్ల పని అనుభవం కలిగి ఉండాలి. కరస్పాండెన్స్/ పార్ట్ టైం పద్ధతిలో కోర్సు పూర్తి చేసిన వారికి దరఖాస్తు చేసుకునే అర్హత లేదు.
‣ మేనేజర్ (క్రెడిట్ ప్రొసీజర్స్) ఉద్యోగాలకు ఫుల్ టైం ఎంబీఏ/ తత్సమాన/ పీజీడీఎం/ పీజీడీబీఏ/ సీఎఫ్ఏ/ ఎఫ్ఆర్ఎం ఉత్తీర్ణతతో సంబంధిత నైపుణ్యాలు ఉండాలి. కనీసం 6 ఏళ్ల అనుభవం ఉండాలి. కరస్పాండెన్స్/ పార్ట్ టైం పద్ధతిలో కోర్సు పూర్తి చేసిన వారు అనర్హులు.
‣ అసిస్టెంట్ మేనేజర్, డిప్యూటీ మేనేజర్, ఐటీ సెక్యూరిటీ ఎక్స్పర్ట్, ప్రాజెక్ట్ మేనేజర్, అప్లికేషన్ ఆర్కిటెక్ట్, టెక్నికల్ లీడ్ ఉద్యోగాలకు అప్లై చేయాలంటే కంప్యూటర్ సైన్స్/ ఐటీ/ ఈసీఈలో ఇంజినీరింగ్ గ్రాడ్యుయేషన్/ ఎంసీఏ/ ఎమ్మెస్సీ(ఐటీ)/ ఎమ్మెస్సీ(కంప్యూటర్ సైన్స్) ల్లో ఏదో ఒక దానిలో పాసై ఉండాలి. కనీసం ఎనిమిదేళ్ల పని అనుభవం ఉండాలి.
‣ అసిస్టెంట్ మేనేజర్, డిప్యూటీ మేనేజర్(సెక్యూరిటీ అనలిస్ట్) పోస్టులకు దరఖాస్తు చేయాలంటే కంప్యూటర్ సైన్స్/ ఐటీ/ ఈసీఈలో ఇంజినీరింగ్ గ్రాడ్యుయేషన్/ ఎంసీఏ/ ఎమ్మెస్సీ(ఐటీ)/ ఎమ్మెస్సీ(కంప్యూటర్ సైన్స్) ఉత్తీర్ణత, సంబంధిత నైపుణ్యాలు ఉండాలి. కనీసం అయిదేళ్ల అనుభవం ఉండాలి.
‣ మేనేజర్ (నెట్వర్క్ సెక్యూరిటీ స్పెషలిస్ట్, నెట్వర్క్ రూటింగ్ & స్విచ్చింగ్ స్పెషలిస్ట్) ఉద్యోగాల కోసం కనీసం 60% మార్కులతో మాస్టర్స్ డిగ్రీ ఉత్తీర్ణత, సంబంధిత టెక్నికల్ నైపుణ్యాల్లో సర్టిఫికెట్ కోర్సులు, కనీసం 6 ఏళ్ల అనుభవం ఉండాలి.
‣ డిప్యూటీ మేనేజర్ (ఇంటర్నల్ ఆడిట్) పోస్టులకు దరఖాస్తు చేయాలంటే ఐసీఏఐ నుంచి చార్టెడ్ అకౌంటెన్సీ(సీఏ) ఉత్తీర్ణులై ఉండాలి. ఎంఎస్ ఆఫీస్ వినియోగించే నైపుణ్యం, కనీసం ఏడాది పని అనుభవం ఉండాలి.
‣ ఇంజినీర్ (ఫైర్) ఖాళీలకు అప్లై చేయాలంటే సంబంధిత సబ్జెక్టులో బీఈ/ బీటెక్/ గ్రాడ్యుయేషన్ ఉత్తీర్ణత, సంబంధిత నైపుణ్యాలు, అనుభవం ఉండాలి.
ఎంపిక ఎలా?
మేనేజర్ (క్రెడిట్ ప్రొసీజర్స్), ఇంజినీర్ (ఫైర్) ఉద్యోగాలు మినహా మిగిలిన అన్ని పోస్టులకు రాత పరీక్ష, ఇంటర్వ్యూల ద్వారా నియామకాలు చేపడతారు. జనరల్ ఆప్టిట్యూడ్, సంబంధిత ప్రొఫెషనల్ నాలెడ్జ్ ని పరిశీలిస్తారు.
మేనేజర్ (క్రెడిట్ ప్రొసీజర్స్), ఇంజినీర్ (ఫైర్) ఉద్యోగాలకు మాత్రం దరఖాస్తులను షార్ట్ లిస్ట్ చేసి, అభ్యర్థులను ఇంటర్వ్యూలకు పిలుస్తారు. అందులో ప్రదర్శంచిన ప్రతిభ ఆధారంగా నియామకాలు చేపడతారు.
పరీక్ష విధానం
‣ మేనేజర్ (మార్కెటింగ్), డిప్యూటీ మేనేజర్ (మార్కెటింగ్) ఉద్యోగాల కోసం రాత పరీక్ష నిర్వహిస్తారు. ఒక వేళ తగినంత మంది అభ్యర్థులు లేకపోతే షార్ట్ లిస్ట్ చేసి, ఇంటర్వ్యూలు జరిపి నియామకాలు చేపడతారు. రాత పరీక్ష నిర్వహిస్తే, అందులో రెండు విభాగాలు ఉంటాయి. మొదటిది 200 మార్కులకు 200 ఆబ్జెక్టివ్ తరహా ప్రశ్నలతో ఉంటుంది. దీనికి కేటాయించిన సమయం 120 నిమిషాలు. బ్యాంకింగ్ నాలెడ్జ్, డేటా ఇంటర్ ప్రిటేషన్ అండ్ అనాలిసిస్, రీజనింగ్, జనరల్ అవేర్ నెస్ అండ్ మార్కెటింగ్ స్కిల్స్ విభాగాల్లో ప్రతిదాని నుంచి 50 ప్రశ్నలు 50 మార్కులకు ఉంటాయి. ఇంగ్లిష్ నాలెడ్జ్ టెస్ట్ డిస్క్రిప్టివ్ విధానంలో ఉంటుంది. లెటర్ రైటింగ్, ఎస్సేలపై ప్రశ్నలు ఉంటాయి. 50 మార్కులకు జరిగే ఈ పరీక్షను 30 నిమిషాల్లో పూర్తి చేయాలి. రాత పరీక్ష మొత్తం ఆన్ లైన్ లో నిర్వహిస్తారు. ఆబ్జెక్టివ్ తరహా పరీక్షలోని ప్రతి సబ్జెక్టులో బ్యాంకు నిర్ణయించే కనీస మార్కులను పొందిన వారి డిస్క్రిప్టివ్ పేపర్లను మాత్రమే మూల్యాంకనం చేస్తారు. రాత పరీక్షలో అర్హత సాధించిన వారిని ఇంటర్వ్యూలకు పిలుస్తారు. ఇది 25 మార్కులకు ఉంటుంది. రాత పరీక్ష, ఇంటర్వ్యూల్లో సాధించిన మెరిట్ ఆధారంగా తుది ఎంపికలు నిర్వహిస్తారు. ఒక వేళ అదే ఉద్యోగాలకు రాత పరీక్ష నిర్వహించకపోతే బ్యాంకు నిబంధనల మేరకు అభ్యర్థులను షార్ట్ లిస్ట్ చేస్తారు. వీరికి 100 మార్కులకు ఇంటర్వ్యూ నిర్వహిస్తారు. ఇందులో పొందిన మెరిట్ ఆధారంగా నియామకాలు చేపడతారు.
‣ అసిస్టెంట్ మేనేజర్ (సిస్టమ్స్), డిప్యూటీ మేనేజర్ (సిస్టమ్స్), అసిస్టెంట్ మేనేజర్ (సెక్యూరిటీ అనలిస్ట్), డిప్యూటీ మేనేజర్ (సెక్యూరిటీ అనలిస్ట్), ఐటీ సెక్యూరిటీ ఎక్స్ పర్ట్, ప్రాజెక్ట్ మేనేజర్, అప్లికేషన్ ఆర్కిటెక్ట్, టెక్నికల్ లీడ్ ఉద్యోగాలకు నిర్వహించే రాత పరీక్షలో జనరల్ ఆప్టిట్యూడ్ కింద రీజనింగ్ (50 మార్కులకు 50 ప్రశ్నలు), క్వాంటిటేటివ్ ఆప్టిట్యూడ్ ( 35 ప్రశ్నలు 35 మార్కులకు), ఇంగ్లిష్ లాంగ్వజీ (35 ప్రశ్నలు 35 మార్కులకు) ల్లో మొత్తం 120 ప్రశ్నలతో పరీక్ష ఉంటుంది. దీనికి కేటాయించిన సమయం 90 నిమిషాలు. ప్రొఫెషనల్ నాలెడ్జ్ పరీక్ష కింద 75 ప్రశ్నలను 150 మార్కులకు అడుగుతారు. ఈ పరీక్షను 70 నిమిషాల్లో పూర్తి చేయాలి. అసిస్టెంట్ మేనేజర్ (సిస్టమ్స్), డిప్యూటీ మేనేజర్ (సిస్టమ్స్), అసిస్టెంట్ మేనేజర్ (సెక్యూరిటీ అనలిస్ట్), డిప్యూటీ మేనేజర్ (సెక్యూరిటీ అనలిస్ట్) ఉద్యోగాలకు సంబంధించి ప్రొఫెషనల్ నాలెడ్జ్ టెస్ట్ లో ప్రశ్నలు జనరల్ ఐటీ నుంచి అడుగుతారు. మిగతా పోస్టులకు ఆయా బాధ్యతలకు సంబంధించిన అంశాల నుంచి ప్రశ్నలు ఇస్తారు. ఇందులో సాధించిన మెరిట్ ఆధారంగా ఇంటర్వ్యూలకు ఆహ్వానిస్తారు. ఇది 150 మార్కులకు జరుగుతుంది.
‣ మేనేజర్ (నెట్ వర్క్ సెక్యూరిటీ స్పెషలిస్ట్), మేనేజర్ (నెట్ వర్క్ రూటింగ్ అండ్ స్విచింగ్ స్పెషలిస్ట్) ఉద్యోగాల ఎంపిక రాత పరీక్ష, ఇంటర్వ్యూల ద్వారా జరుగుతుంది. రాత పరీక్షలో ప్రొఫెషనల్ నాలెడ్జ్ పై 80 ప్రశ్నలను 100 మార్కులకు అడుగుతారు. 120 నిమిషాల సమయం ఉంటుంది. ఇంటర్వ్యూ 25 మార్కులకు ఉంటుంది. ఈ రెండింటిలో సాధించిన మార్కుల ప్రాతిపదిన తుది నియామకాలు నిర్వహిస్తారు.
‣ డిప్యూటీ మేనేజర్ (ఇంటర్నల్ ఆడిట్) ఉద్యోగాలకు రాత పరీక్ష ఇంటర్వ్యూ ఉంటాయి. ఆబ్జెక్టివ్ తరహాలో రాత పరీక్షలో టెస్ట్ ఆఫ్ రీజనింగ్ (50 మార్కులకు 50 ప్రశ్నలు), క్వాంటిటేటివ్ ఆప్టిట్యూడ్ (35 ప్రశ్నలకు 35 మార్కులు), ఇంగ్లిష్ (35 మార్కలకు 35 ప్రశ్నలు) విభాగాల నుంచి మొత్తం 120 ప్రశ్నలు ఉంటాయి. 90 నిమిషాల సమయం ఉంటుంది. ప్రొఫెషనల్ నాలెడ్జ్ కి సంబంధించి 50 ప్రశ్నలు 100 మార్కులకు ఇస్తారు. దీనికి 60 నిమిషాల సమయం ఉంటుంది. ఇంటర్య్వూ 25 మార్కులకు జరుపుతారు. ఈ రెండింటిలో సాధించిన మెరిట్ ఆధారంగా తుది ఎంపిక ఉంటుంది.
‣ మేనేజర్ (క్రెడిట్ ప్రొసీజర్స్), ఇంజినీర్ (ఫైర్) ఉద్యోగాలకు దరఖాస్తుల పరిశీలన అనంతరం షార్ట్ లిస్ట్ చేసి అభ్యర్థులకు 100 మార్కులకు ఇంటర్య్వూలు నిర్వహిస్తారు. అందులో సాధించిన మార్కుల ఆధారంగా ఎంపికలు చేపడతారు.
ప్రిపరేషన్ ఇలా..
రీజనింగ్; ఇందులో అభ్యర్థుల తార్కిక ఆలోచన విధానాన్ని పరిశీలిస్తారు. నంబర్లు, డిజైన్ల మధ్య సంబంధాలను ఏవిధంగా అర్థం చేసుకుంటున్నారో పరీక్షిస్తారు. కోడింగ్, డీ-కోడింగ్, అనాలజీ, సిరీస్, డైరెక్షన్స్, సీటింగ్ అరెంజ్ మెంట్స్, రక్తసంబంధాలు, ర్యాంకింగ్, పజిల్స్, ఆల్ఫాబెట్ టెస్ట్ తదితర అంశాల నుంచి ప్రశ్నలు వస్తాయి. ఇందులో మంచి మార్కులు సాధించాలంటే వీలైనంత ఎక్కువ సాధన చేయాలి. సంప్రదాయ పద్ధతులతోపాటు షార్ట్ కట్స్ వీలైనన్ని ఎక్కువ సాధన చేయాలి. మిర్రర్ ఇమేజెస్, బొమ్మలతో కూడిన ప్రశ్నలను ప్రాక్టీస్ చేయాలి.
క్వాంటిటేటివ్ ఆప్టిట్యూడ్; ఆప్టిట్యూడ్ పరీక్షల్లో ప్రధానమైన విభాగం క్వాంటిటేటివ్ ఆప్టిట్యూడ్. ప్రతి ఆప్టిట్యూడ్ పరీక్షలో ఇది అంతర్భాగంగా ఉంటుంది. అభ్యర్థుల్లోని తార్కిక, విశ్లేషనాత్మక, పరిమాణాత్మక నైపుణ్యాలను ఇందులో పరీక్షిస్తారు. సమస్యలను పరిష్కరించే సామర్థ్యాన్ని; అంకెలు, సంఖ్యలపై పట్టును; గణిత నైపుణ్యాలను అంచనా వేస్తారు. దీనికి సంబంధించి గణితంలో కీలక భావనలైన కూడికలు, తీసివేతలు, భాగహారాల వంటి వాటిపై పట్టు సాధించాలి. నిష్పత్తులు, శాతాలు, వర్గమూలాలు, ఘనమూలాలు, లాభ-నష్టాలు, కాలం-పని, కాలం-దూరం మొదలైన అంశాలను ప్రాథమిక స్థాయి నుంచి ప్రాక్టీస్ చేయాలి. వందశాతం మార్కులు సంపాదించుకోడానికి అనుకూలమైన విభాగం. అభ్యర్థులు ప్రత్యేక శ్రద్ధతో ప్రిపేర్ కావాలి.
ఇంగ్లిష్ లాంగ్వీజీ; తోటి ఉద్యోగులతో, పై అధికారులతో సమర్థంగా సంభాషించడానికి, విధి నిర్వహణలో భాగంగా ఆంగ్లంలో వచ్చే రకరకాల పత్రాలను సరిగా అర్థం చేసుకోడానికి కనీస ఇంగ్లిష్ నాలెడ్జ్ అవసరం. ఇందుకోసమే సాధారణంగా నియామక పరీక్షల్లో ఈ ప్రశ్నలు ఇస్తారు. కరెక్షన్ ఆఫ్ సెంటెన్సెస్, రీడింగ్ కాంప్రహెన్షన్, జంబుల్డ్ సెంటెన్సెస్, రూట్ వర్డ్స్, ఆర్టికల్స్, ప్రిపోజిషన్స్ తదితర విభాగాల నుంచి ప్రశ్నలు వస్తుంటారు. అభ్యర్థులు గ్రామర్ పై కనీస అవగాహన పెంపొందించుకోవాలి. పత్రికలు, ప్రామాణిక పుస్తకాలు చదవడం ద్వారా ఆంగ్ల పదసంపదను పెంచుకోవచ్చు.
ప్రొఫెషనల్ నాలెడ్జ్; అభ్యర్థి దరఖాస్తు చేసిన విభాగానికి సంబంధించి తగిన నాలెడ్జ్ కలిగి ఉన్నాడో లేదో ఈ పరీక్షలో పరిశీలిస్తారు. నిర్దిష్ట విధుల నిర్వహణకు కచ్చితంగా కొంత ప్రత్యేక అవగాహన ఉండాలి. ఇందుకోసం ఆయా పోస్టులకు అర్హతగా నిర్ణయించిన డిగ్రీ లేదా పీజీ కోర్సు సిలబస్ నుంచి ప్రశ్నలు అడుగుతారు. ఉదాహరణకు ఐటీని తీసుకుంటే బ్యాంకింగ్ రంగంలో వినియోగదారులకు సౌకర్యవంతమైన సేవలు అందించడానికి అవసరమైన అంశాలపై ఎక్కువ ప్రశ్నలు వస్తాయి. అదేవిధంగా సెక్యూరిటీ, మార్కెటింగ్ తదిరాలూ ఉంటాయి.
బ్యాంకింగ్ నాలెడ్జ్; ఇందులో సాధారణంగా బ్యాంకింగ్ పరిభాషలు, తాజా సాంకేతికతలు, బ్యాంకింగ్ చరిత్ర, ప్రస్తుత వ్యవహారాలకు సంబంధించిన అంశాలపై ప్రశ్నలు వచ్చే అవకాశం ఉంది. బ్యాంకులకు సంబంధించి దిన పత్రికల్లో వచ్చే విషయాలపై అవగాహన కలిగి ఉండటం అవసరం.
డేటా ఇంటర్ ప్రిటేషన్ అండ్ అనాలిసిస్; ఇది గణితంలోని అనేక ప్రక్రియల అమలులో అభ్యర్థుల నాలెడ్జ్ ను అంచనా వేస్తుంది. ముగిసిన లావాదేవీల డేటా ఆధారంగా విశ్లేషణలు చేసి కొన్ని అంశాలను, అర్థాలను, ప్రయోజనాలను రాబడతారు. ఈ సామర్థ్యం అభ్యర్థుల్లో తగినంత ఉందో లేదో ఈ పరీక్షతో నిర్ణయిస్తారు.
జనరల్ అవేర్ నెస్ అండ్ మార్కెటింగ్ స్కిల్స్; సంస్కృతి, ఆర్థికం, భౌగోళికం, పాలిటీ, శాస్త్రీయ పరిశోధనలు, క్రీడలు తదితర అంశాలతోపాటు ఉత్పత్తులకు సంబంధించి మార్కెటింగ్ సాధనాలు, పద్ధతుల వంటి వాటిపై ప్రశ్నలు వస్తాయి. వాటిపై సరైన అవగాహన ఉంటేనే విక్రయదారులు సమర్థంగా వాటిని అమ్మగలుగుతారు. అభ్యర్థిలోని అలాంటి సామర్థ్యాలను ఈ విభాగంలో పరిశీలిస్తారు.
ప్రతి విభాగానికి సంబంధించిన ప్రశ్నల సరళిని అర్థం చేసుకోడానికి పాత ప్రశ్నపత్రాలను పరిశీలించాలి. తదనుగుణంగా ప్రిపరేషన్ ప్రణాళికను రూపొందించుకోవాలి. సరైన దిశానిర్దేశం లేకుండా సాగే అధ్యయనం వల్ల లాభాల కంటే నష్టమే ఎక్కువ ఉంటుందని అభ్యర్థులు గ్రహించాలి.
అభ్యర్థులు దరఖాస్తులను ఆన్ లైన్ లో పంపాలి. దరఖాస్తుకు చివరి తేదీ 11 జనవరి, 2021. ఆన్ లైన్ రాత పరీక్షలు 2021 ఫిబ్రవరి 1, 7 తేదీల్లో జరిగే అవకాశం ఉంది.
వెబ్సైట్: https://www.sbi.co.in/