గ్రామీణ ప్రాంతాల్లో బ్యాంకింగ్ సేవలను విస్తరించాలనే లక్ష్యంతో రీజినల్ రూరల్ బ్యాంకులను ఏర్పాటు చేశారు. సొంత ఊళ్లకు దగ్గరగా పనిచేయాలనుకు వారికి అనుకూలమైన ఉద్యోగాలు ఇవి.
ఎంపిక ఎలా?
రాత పరీక్షలో వచ్చిన మార్కుల ఆధారంగా ఆఫీస్ అసిస్టెంట్ (మల్టీపర్పస్) ఉద్యోగాలను సొంతం చేసుకోవచ్చు. స్కేల్ - 1 ఆఫీసర్లకు రెండు దశల్లో రాత పరీక్ష, ఇంటర్వ్యూ ఉంటాయి. స్కేల్ -2, 3 ఆఫీసర్లకు ఒక రాత పరీక్ష, ఇంటర్వ్యూ నిర్వహిస్తారు. వాటిలో సాధించిన మెరిట్ ఆధారంగా ఎంపికలు జరుగుతాయి.
ప్రిపరేషన్ విధానం
పరీక్షల తేదీలను ఇంత వరకు ప్రకటించలేదు. త్వరలో వెల్లడించే అవకాశం ఉంది. గత అనుభవాల దృష్ట్యా కనీసం రెండు నెలల సమయం ప్రిలిమ్స్ కు ఉంటుంది. ఆఫీస్ అసిస్టెంట్, స్కేల్ -1 ఆఫీసర్ల పరీక్షల్లో రెండు సబ్జెక్టులు మాత్రమే ఉన్నాయి. మొదటిసారి పరీక్షలు రాసే అభ్యర్థులకు కూడా ఈ సమయం సరిపోతుంది. ఇందులో రీజనింగ్, న్యూమరికల్ ఎబిలిటీ విభాగాల నుంచి 80 ప్రశ్నలు వస్తాయి. 45 నిమిషాల సమయం ఇస్తారు. అంటే సరాసరిన అర నిమిషం మాత్రమే ఉంటుంది. మంచి మార్కులు సాధించాలంటే విస్తృతమైన సాధన చేయాలి.
