Post your question

 

Q: నేను 10+2 (ఐటీఐ) చేశాను. కానిస్టేబుల్ పోస్టులకు దరఖాస్తు చేసుకునే అవకాశం ఉంటుందా?

    Asked By: శివ

    Ans:

    కానిస్టేబుల్‌ పోస్టులకు డిప్లొమా చేసినవారికి అర్హత ఉంది. కానీ, ఐటీఐ వారికి అవకాశం లేదు.

Q: ఎక్సైజ్ ప్రొహిబిషన్ కానిస్టేబుల్ ఉద్యోగానికి దరఖాస్తు చేసేటప్పుడు ఓటీఆర్‌లో పొరపాటున నా భర్త ఆధార్‌ను అప్‌లోడ్ చేశాను. ఇప్పుడు సరిచేయడం ఎలా?

    Asked By: ఒక అభ్యర్థిని

    Ans:

    ఓటీఆర్‌ ఎడిట్‌ ఆప్షన్‌కి వెళ్లి ఆధార్‌ నంబరును సరిచేసుకుంటే సరిపోతుంది.

Q: నేను ఒకటి, రెండు తరగతులు వరంగల్‌లో; మూడు నుంచి అయిదో తరగతి హైదరాబాద్‌లో; ఆరు, ఏడు తరగతులు రంగారెడ్డి జిల్లాలో చదివాను. ప్రస్తుతం నేను చదివిన పాఠశాలలన్నింటినీ మూసివేశారు. ఇప్పుడు బోనఫైడ్ సర్టిఫికెట్‌లను పొందడం ఎలా? గ్రూప్-1 లేదా ఇతర స్టేట్ సర్వీస్ ఉద్యోగాలకు దరఖాస్తు చేయవచ్చా?

    Asked By: రాజా రవికిరణ్

    Ans:

    మీరు చదివిన స్కూల్స్‌ ప్రభుత్వ గుర్తింపు పొందినవి అయితే సంబంధిత ప్రాంతాల్లోని ఎంఈఓ కార్యాలయాల నుంచి బోనఫైడ్‌ సర్టిఫికెట్‌ను పొందవచ్చు. ఒకవేళ ప్రభుత్వ గుర్తింపు పొందని పాఠశాల అయితే ఓటీఆర్‌లో ప్రైవేట్‌ అని నింపి, తహసీల్దార్‌ నుంచి   ఆ కాలానికి సంబంధించి స్థానికతను తెలిపే సర్టిఫికెట్‌ను సమర్పించాల్సి ఉంటుంది. అప్పుడు మీరు గ్రూప్‌-1 లేదా ఇతర స్టేట్‌ సర్వీస్‌ ఉద్యోగాలకు నిస్సందేహంగా దరఖాస్తు చేసుకోవచ్చు.

Q: నేను 1వ తరగతి నుంచి 4వ తరగతి వరకు నారాయణపేట; 5 నుంచి 10వ తరగతి వరకు వనపర్తి జిల్లాలో చదివాను. ఏ జిల్లాలో స్థానికతను పొందుతాను.

    Asked By: విరాజ్ హనుమ

    Ans:

    మీరు నారాయణపేట స్థానికతను పొందుతారు.

Q: టీఎస్‌పీఎస్సీ గ్రూప్-1 దరఖాస్తుకు డిగ్రీ సర్టిఫికెట్‌ను తప్పనిసరిగా అప్‌లోడ్ చేయలా లేదా పాస్ అయిన సంవత్సరం, తేదీని వేస్తే సరిపోతుందా?

    Asked By: కె. ప్రియాంక

    Ans:

    మీ దగ్గర డిగ్రీ సర్టిఫికెట్‌ అందుబాటులో ఉంటే అప్‌లోడ్‌ చేయండి. లేదంటే పాస్‌ అయిన సంవత్సరం, తేదీని వేస్తే సరిపోతుంది. అయితే వెరిఫికేషన్‌ సమయంలో డిగ్రీ సర్టిఫికెట్‌ను  కచ్చితంగా సమర్పించాలి.

Q: నా కుటుంబం, పూర్వీకులు తెలంగాణకు చెందిన వారే. కానీ, జీవనాధారం కోసం మహారాష్ట్రకు వలస వెళ్లారు. అక్కడే అయిదో తరగతి వరకు చదివాను. ఆరో తరగతి నుంచి పదో తరగతి వరకు తెలంగాణలో చదివాను. నాకు తెలంగాణ రాష్ట్ర స్థానికత వర్తిస్తుందా?

    Asked By: ప్రణయ్

    Ans:

    ప్రస్తుత నిబంధనల ప్రకారం ఏడో తరగతి వరకు తెలంగాణలో చదివి ఉంటే స్థానికతను పొందుతారు. కానీ, మీరు మహారాష్ట్రలోనే ఎక్కువ కాలం చదవడం వల్ల తెలంగాణ స్థానికత వర్తించదు.

Q: నేను కానిస్టేబుల్ డ్రైవర్ పోస్ట్‌కి దరఖాస్తు చేశాను. 2019 సంవత్సరం నుంచి లైసెన్స్ బ్యాడ్జి ఉంది. కానీ, దాని వ్యాలిడిటీ 2022 నవంబరుతో ముగుస్తుంది. తిరిగి రెన్యువల్ చేయించుకోవడానికి ఏమైనా ఇబ్బందులు ఉంటాయా? ఆర్‌టీఏ ఫిజికల్ కార్డ్‌లు జారీ చేయడానికి ఆలస్యం అవుతుంది. వెరిఫికేషన్‌లో వర్చ్యువల్ కార్డ్ చూపిస్తే సరిపోతుందా?

    Asked By: కర్రె

    Ans:

    వ్యాలిడిటీ గడువు ముగిసేలోపు రెన్యువల్‌ చేయించుకోండి. ఎలాంటి ఇబ్బంది ఉండదు. ఆర్‌టీఏ ఫిజికల్‌ కార్డ్‌ల జారీలో ఆలస్యం ఏమీ జరగదు.

Q: నేను టీఎస్‌పీఎస్సీ గ్రూప్-2కి సిద్ధమవుతున్నాను. ఒకటి, రెండు తరగతులకు సంబంధించిన స్టడీ సర్టిఫికెట్‌లు లేవు. మూడో తరగతి నుంచి అన్నీ ఉన్నాయి. అవి సరిపోతాయా?

    Asked By: సుబానా

    Ans:

    మీరు ఒకటి, రెండు తరగతులకు సంబంధించి ఎలాంటి స్టడీ సర్టిఫికెట్లు లేకపోయినా ఆందోళన చెందాల్సిన అవసరం లేదు. ఆ తరగతుల వివరాలను ఓటీఆర్‌లో ప్రైవేట్‌ అని నింపండి. అలాగే ఆ కాలానికి సంబంధించి తహసీల్దార్‌ సంతకం చేసిన నివాస ధ్రువీకరణ పత్రాన్ని సమర్పించండి. సరిపోతుంది.

Q: ఒకటి, రెండు తరగతులు ప్రభుత్వ గుర్తింపులేని పాఠశాలలో చదివాను. ప్రస్తుతం ఆ పాఠశాల కూడా లేదు. ఓటీఆర్‌లో స్కూల్ వివరాలు ఏమని నింపాలి. ఒకవేళ నివాస ధ్రువీకరణ పత్రాన్ని తీసుకుంటే ఏ సంవత్సరానిది తీసుకోవాలి?

    Asked By: శ్రీనివాస్

    Ans:

    ఒకటి, రెండు తరగతులకు సంబంధించి ఓటీఆర్‌లో ప్రైవేట్‌ అని నింపండి. తహసీల్దార్‌ నుంచి ఆ కాలానికి చెందిన నివాస ధ్రువీకరణ పత్రాన్ని తీసుకోండి.

Q: డీఎస్‌పీ ఎంపిక సమయంలో బీసీ క్రీమీలేయర్ వర్గానికి చెందినవారి వయసును జనరల్ కేటగిరీ కింద చూస్తారా లేదా బీసీ కేటగిరీగా పరిగణిస్తారా తెలియజేయండి.

    Asked By: సతీష్

    Ans:

    మీరు క్రీమీలేయర్‌ పరిధిలో ఉన్నట్లయితే వయసుకు సంబంధించి ఎలాంటి సడలింపులు వర్తించవు. ఓసీ నిబంధనలే వర్తిస్తాయి.