Post your question

 

Q: నేను ఏఈఈ పరీక్షకు సిద్ధమవుతున్నాను. బీటెక్ చివరి సంవత్సరం ఫలితాలు ఒక నెలలో వస్తాయి. ఉద్యోగ దరఖాస్తుకి ఫలితాలు వస్తే సరిపోతుందా లేదా మెమో కూడా కావాలా?

    Asked By: చందన

    Ans:

    దరఖాస్తు సమయానికి ఫలితాలు వచ్చి ఉంటే సరిపోతుంది. సర్టిఫికెట్ల వెరిఫికేషన్‌ సమయానికి మెమో తప్పనిసరిగా ఉండాలి.

Q: బోనఫైడ్ లేని తరగతుల సంవత్సరాలకు రెసిడెన్స్ సర్టిఫికెట్ ఇవ్వమని ఎంఆర్ఓ కార్యాలయంలో అడిగితే అలాంటి ప్రొఫార్మా ఏదీ లేదంటున్నారు. కావాలంటే 15 లేదా 20 సంవత్సరాలకు నివాస ధ్రువీకరణ పత్రం ఇస్తామంటున్నారు. అవసరమైన కాలానికి రెసిడెన్స్ సర్టిఫికెట్ ఎలా తీసుకోవాలి?

    Asked By: సందీపన్

    Ans:

    2018 జీఓ 124ను తహసీల్దారుకు చూపిం చండి. సంబంధిత కాలానికి రెసిడెన్స్‌ సర్టిఫికెట్‌ను పొందే అవకాశాన్ని ఆ జీఓ కల్పిస్తోంది.

Q: నేను గ్రూప్-1కి దరఖాస్తు చేసినప్పుడు కుల ధ్రువీకరణ సాఫ్ట్ కాపీని సబ్మిట్ చేశాను. తర్వాత చూసుకుంటే నా దగ్గర ఉన్న హార్డ్ కాపీ మిస్ అయ్యింది. వెరిఫికేషనప్పుడు సాఫ్ట్ కాపీని చూపిస్తే సరిపోతుందా?

    Asked By: స్వరూప

    Ans:

    వెరిఫికేషన్‌ సమయానికి కచ్చితంగా హార్డ్‌కాపీ ఉండాలి. కుల ధ్రువీకరణ పత్రం కోసం మళ్లీ దరఖాస్తు చేసుకోండి.

Q: నేను ఒకటో తరగతి నుంచి అయిదో తరగతి వరకు ప్రభుత్వ పాఠశాలలో చదివాను. కానీ ఇప్పుడు ఆ స్కూల్ రికార్డులు లేవు. వారు నాకు బోనఫైడ్ సర్టిఫికెట్‌లు ఇవ్వలేదు. ఇప్పుడు వాటిని పొందడం ఎలా?

    Asked By: ఒక అభ్యర్థి

    Ans:

    మీరు సంబంధిత ప్రాంత ఎంఈఓ లేదా డీఈఓ కార్యాలయం నుంచి బోనఫైడ్‌ సర్టిఫికెట్లను తెచ్చుకోవచ్చు.

Q: గ్రూప్-3 సర్వీస్ పేపర్-2 చరిత్ర విభాగంలో తెలంగాణ చరిత్రతోపాటు భారతదేశ చరిత్ర కూడా చదవాలా?

    Asked By: పి. నరసింహన్

    Ans:

    గ్రూప్‌-3 సర్వీస్‌ పేపర్‌-2 చరిత్ర విభాగంలో యాభైశాతం తెలంగాణ చరిత్ర, యాభై శాతం భారతదేశ చరిత్ర ఉంటాయి. కాబట్టి మీరు తెలంగాణతోపాటు భారతదేశ చరిత్రను కూడా చదవాల్సి ఉంటుంది.

Q: పదోతరగతి మెమోలో నా పేరు కె.అచ్యుతరావు అని, డిగ్రీ సర్టిఫికెట్‌లో కందుల అచ్యుతరావు అని ఉంది. టీఎస్‌పీఎస్సీ సర్టిఫికెట్ వెరిఫికేషన్ సమయంలో ఏదైనా సమస్య ఉంటుందా?

    Asked By: కె.అచ్యుతరావు

    Ans:

    ఎలాంటి సమస్య ఉండదు. ఏ సందేహం లేకుండా టీఎస్‌పీఎస్సీ పరీక్షలకు బాగా ప్రిపేర్‌ అవ్వండి.

Q: టీఎస్‌పీఎస్సీ అధికారిక వెబ్‌సైట్‌లో గ్రూప్-2 ఇండియన్ ఎకానమీ సిలబస్‌లో ఇండియన్ అగ్రికల్చర్, ఎల్‌పీజీ 1991, మనీ అండ్ ఇన్‌ఫ్లేషన్, ఆర్‌బీఐ, మానిటరీ పాలసీ, బడ్జెట్, ఎకనామిక్ సర్వే, ఐఎంఎఫ్, వరల్డ్ బ్యాంక్ అంశాలు ఎక్కడా కనిపించలేదు. పరీక్షకు వాటిని చదవాలా?

    Asked By: ఇమ్మాన్యుయేల్

    Ans:

    ఎకనామిక్‌ డెవలప్‌మెంట్‌ అనే టాపిక్‌లోనే ఈ అంశాలన్నీ ఉంటాయి. కాబట్టి, మీరు వాటన్నింటినీ చదవాల్సిందే.

Q: నేను ఒకటి నుంచి ఆరో తరగతి వరకు మేడ్చల్‌లో, ఏడో తరగతి నుంచి పదో తరగతి రంగారెడ్డిలో, ఇంటర్, డిగ్రీ మేడ్చల్‌లో పూర్తిచేశాను. నేను ఏ జిల్లాలో స్థానికతను పొందుతాను?

    Asked By: శ్రవణ్

    Ans:

    మీ ప్రాథమిక విద్య అంతా మేడ్చల్‌లోనే ఎక్కువ కాలం సాగింది కాబట్టి, మీరు అక్కడి స్థానికతనే పొందుతారు.

Q: నేను గ్రూప్-1 కి ప్రిపేర్ అవుతున్నాను. రిజిస్ట్రేషన్‌లో పదోతరగతి హాల్ టికెట్ నంబర్‌లోని ఒక అంకె తప్పుగా నమోదు చేశాను. దీనివల్ల ఉద్యోగ సాధనలో ఏదైనా సమస్య ఉంటుందా?

    Asked By: ఒక అభ్యర్థి

    Ans:

    ఎలాంటి సమస్యా ఉండదు. ఏ సంకోచం లేకుండా గ్రూప్‌-1 ప్రిపరేషన్‌పై శ్రద్ధ పెట్టండి.

Q: గ్రూప్-4 పేపర్-1, పేపర్-2కి మధ్య కొద్ది రోజుల విరామం ఉంటుందా లేదా ఉదయం ఒక పేపర్, సాయంత్రం ఒక పేపర్ జరుగుతాయా?

    Asked By: రాజేష్

    Ans:

    గ్రూప్‌-4 పేపర్‌-1, పేపర్‌-2కి మధ్య కొంత విరామం ఉంటుంది. కానీ ఒకే రోజులో పూర్తవుతాయి.