గణితంలో సూత్రాలు, సిద్ధాంతాలు, పటాలు నేర్చుకుంటే పూర్తి మార్కులు పొందవచ్చు. ముఖ్యంగా ప్రతి లెక్కకు సంబంధించిన సూత్రాలు నేర్చుకోవాలి. ఇవి సమస్య సాధనలో కీలకంగా ఉపయోగపడతాయి. మిగిలిన సబ్జెక్టుల్లా చదవకుండా కేవలం ప్రాక్టీస్తోనే గణితంలో అధిక మార్కులు సాధించవచ్చు.
గణిత శాస్త్రం - I(ఎ)
ఇంటర్మీడియట్ గణితశాస్త్రం - I(ఎ) ప్రశ్నపత్రంలో మూడు విభాగాలు ఉంటాయి. విభాగం - ఎలో 2 మార్కుల ప్రశ్నలు 10 ఉంటాయి. వీటన్నింటికీ జవాబులు రాయాలి. విభాగం - బిలో 4 మార్కుల ప్రశ్నలు 7 ఉంటాయి. వీటిలో 5 ప్రశ్నలకు మాత్రమే సమాధానాలు రాయాలి. విభాగం - సిలో 7 మార్కుల ప్రశ్నలు 7 ఉంటాయి. వీటిలో 5 ప్రశ్నలకు మాత్రమే జవాబులు రాయాలి.
యూనిట్ల వారీగా వెయిటేజి
ప్రమేయాలు: ఈ చాప్టర్ నుంచి ప్రమేయ రకాలు, వ్యాప్తి, వాస్తవ మూల్య ప్రమేయ ప్రదేశం, వ్యాప్తికి సంబంధించి 2 మార్కుల ప్రశ్నలు రెండు; 7 మార్కుల ప్రశ్న ఒకటి వస్తాయి.
మాత్రికలు: దీని నుంచి 2 మార్కుల ప్రశ్నలు రెండు; అనుబంధ మాత్రిక, విలోమ మాత్రికల నుంచి 4 మార్కుల ప్రశ్న ఒకటి వస్తాయి. క్రామర్ పద్ధతి, మాత్రికా విలోమ పద్ధతిలో సమీకరణాలను సాధించడం నుంచి 7 మార్కుల ప్రశ్నలు రెండు వస్తాయి. మొత్తం మాత్రికల నుంచి 22 మార్కులు వస్తాయి.
సదిశల సంకలనం: ఈ యూనిట్ నుంచి 2 మార్కుల ప్రశ్నలు రెండు, 4, 7 మార్కుల ప్రశ్నలు ఒక్కోటి చొప్పున వస్తాయి.
సదిశల గుణనం: ఈ అధ్యాయం నుంచి 2, 4, 7 మార్కుల ప్రశ్నలు ఒక్కోటి చొప్పున వస్తాయి.
గణితశాస్త్రం - I(బి)
ఇంటర్మీడియట్ గణితశాస్త్రం - I(బి) ప్రశ్నపత్రంలో మూడు విభాగాలు ఉంటాయి. విభాగం - ఎలో 2 మార్కుల ప్రశ్నలు పది ఉంటాయి. వీటన్నింటికీ మొత్తం జవాబులు రాయాలి. విభాగం - బిలో 4 మార్కుల ప్రశ్నలు ఏడు ఉంటాయి. వీటిలో 5 ప్రశ్నలకు మాత్రమే జవాబులు రాయాలి. విభాగం - సిలో 7 మార్కుల ప్రశ్నలు ఏడు ఉంటాయి. వీటిలో 5 ప్రశ్నలకు మాత్రమే జవాబులు రాయాలి.
యూనిట్ల వారీగా వెయిటేజి
బిందుపథం: ఈ చాప్టర్ నుంచి 4 మార్కుల ప్రశ్నలు రెండు వస్తాయి.
సరళరేఖ: దీని నుంచి 2 మార్కుల ప్రశ్నల రెండు, 4 మార్కుల ప్రశ్న ఒకటి వస్తాయి. ఇందులోని త్రిభుజం - పరికేంద్రం, లంబకేంద్రాలకు సంబంధించి 7 మార్కుల ప్రశ్న ఒకటి వస్తుంది. మొత్తంగా ఈ చాప్టర్ నుంచి 15 మార్కులు వస్తాయి.
సరళరేఖా యుగ్మాలు: ఈ యూనిట్లో అభ్యాసం 4(బి), 4(సి)ల నుంచి రెండు 7 మార్కుల ప్రశ్నలు వస్తాయి. వీటిలో ఒకటి సిద్ధాంతాల నిరూపణ, మరొకటి ప్రశ్నల సాధనల నుంచి రావడానికి అవకాశం ఉంది.
త్రిపరిమాణ నిరూపకాలు: ఈ అధ్యాయంలో ఒక 2 మార్కుల ప్రశ్న వస్తుంది.
సమతలం: దీని నుంచి ఒక 2 మార్కుల ప్రశ్న వస్తుంది.
దిక్ కొసైన్లు - దిక్ సంఖ్యలు: ఈ చాప్టర్ నుంచి ఒక 7 మార్కుల ప్రశ్న వస్తుంది.
అవధులు - అవిచ్ఛిన్నత: దీని నుంచి రెండు 2 మార్కుల ప్రశ్నలు, ఒక 4 మార్కుల ప్రశ్న వస్తాయి.
అవకలనం: ఈ చాప్టర్ నుంచి రెండు 2 మార్కుల ప్రశ్నలు, 4, 7 మార్కుల ప్రశ్నలు ఒక్కోటి వస్తాయి. దీని నుంచి మొత్తంగా 15 మార్కులు వస్తాయి. కాబట్టి విద్యార్థులు ఈ చాప్టర్పై దృష్టి సారించాలి.
అవకలజాల అనువర్తనాలు: ఈ యూనిట్లో స్పర్శరేఖ, అభిలంబరేఖలకు సంబంధించిన అభ్యాసం 10(బి), 10(డి)ల నుంచి 2, 4, 7 మార్కుల ప్రశ్నలు ఒక్కోటి చొప్పున వస్తాయి. దీనిలోని ఆరోహణ, అవరోహణ ప్రమేయాలపై అభ్యాసం 10(జి) నుంచి 2, 4 మార్కుల ప్రశ్నలు ఒక్కోటి వస్తాయి. ఇదే చాప్టర్ నుంచి గరిష్ఠ, కనిష్ఠ విలువలను కనుక్కునే ఒక 7 మార్కుల ప్రశ్న కూడా వస్తుంది. దీని నుంచి మొత్తంగా 26 మార్కులు వస్తాయి. కాబట్టి విద్యార్థులు వెయిటేజి ఆధారంగా సాధన చేయాలి.