* ‘నైపుణ్యాల ప్రతిభ’పై నాస్కామ్‌ నివేదిక
ఈనాడు, హైదరాబాద్‌: భవిష్యత్తులో ఐటీ రంగంలో టెక్నాలజీ హవా కొనసాగనుంది. కరోనా కారణంగా ఈ రంగంలో కొంత స్తబ్దత నెలకొన్నా.. ఆర్థిక వ్యవస్థ మెరుగైన తరువాత 80 శాతం కొత్త ఉద్యోగాలు ఈ రంగంలోనే రానున్నాయి. దేశంలో ‘భవిష్యత్తు నైపుణ్యాల ప్రతిభ - డిమాండ్‌, సరఫరాలో వ్యత్యాసం’పై అధ్యయనం జరిపిన.. నేషనల్‌ అసోసియేషన్‌ ఆఫ్‌ సాఫ్ట్‌వేర్‌ అండ్‌ సర్వీస్‌ కంపెనీస్‌(నాస్కామ్‌) ఇటీవల ఆ నివేదికను విడుదల చేసింది. ఐటీ రంగంలో భవిష్యత్తులో గిరాకీ మేరకు మానవ వనరులను సిద్ధం చేసేందుకు కేంద్ర, రాష్ట్ర ప్రభుత్వాలు నైపుణ్య శిక్షణను ప్రారంభించాలని నాస్కామ్‌ సూచించింది. 2024 నాటికి ఎంట్రీలెవల్‌ ఉద్యోగాల్లో భారతీయ యువత పాగావేసేందుకు నైపుణ్యాలతో సిద్ధం కావాలని, ఈ ఉద్యోగాల్లో 50 శాతం ఉద్యోగాలకు ద్రువీకరణ పత్రాలు అవసరమని పేర్కొంది. దేశంలో భవిష్యత్తు నైపుణ్యాలు కలిగిన నిపుణుల కొరత ఎక్కువగా ఉందని, ఇప్పటికిప్పుడు అంచనాలను పరిశీలిస్తే గిరాకీ 8 రెట్లు అధికంగా ఉందని తెలిపింది. ఈ డిమాండ్‌ 2024 నాటికి 20 శాతానికి చేరుకోనుందని వివరించింది.
12-13 లక్షల మందికి ఉద్యోగాలు
నాస్కామ్‌ నివేదిక ప్రకారం.. డిజిటల్‌ టెక్నాలజీ రంగంలో 2024 నాటికి దాదాపు 12-14 లక్షల మందికి ఉద్యోగాలు లభించే అవకాశాలున్నాయి. బెంగళూరు, దిల్లీ, ముంబయి, పుణె, హైదరాబాద్‌, చెన్నై నగరాల్లో టెక్నాలజీలో ఉద్యోగాల వృద్ధి రేటు 19-30 శాతానికి చేరుకోనుంది. దేశవ్యాప్తంగా 11-13 స్టార్టప్‌లు ఈ రంగంలో ఎక్కువ ఉద్యోగావకాశాలను కల్పిస్తున్నాయి. భవిష్యత్తు అవసరాలు, డిమాండ్‌ను దృష్టిలో పెట్టుకుని ఐటీ సంస్థలు తమ ఉద్యోగులకు నైపుణ్య శిక్షణ అందించడంతోపాటు కొత్త టెక్నాలజీ రంగాల్లోనూ పెట్టుబడులు పెడుతున్నాయి.
‣ Read Latest jobs, Latest notifications and Latest govt jobs
‣ Follow us on Facebook, Twitter, Koo, Share chat, Google News Subscribe our Youtube Channel.
