ఐఆర్‌ఈఎల్‌లో సూపర్‌వైజర్‌ ట్రెయినీలు

‣ డిగ్రీ, డిప్లొమాతో దరఖాస్తుకు అవకాశం

ఇండియన్‌ రేర్‌ ఎర్త్స్‌ (ఐఆర్‌ఈఎల్‌-ఇండియా) లిమిటెడ్‌ 56 నాన్‌-అన్‌యూనియనైజ్డ్‌ సూపర్‌వైజర్‌ ట్రెయినీ పోస్టుల భర్తీకి నోటిఫికేషన్‌ విడుదల చేసింది. డిగ్రీ, ఇంజినీరింగ్‌ డిప్లొమా అర్హతతో అభ్యర్థులు ఆన్‌లైన్‌లో దరఖాస్తు చేసుకోవచ్చు. రాత పరీక్ష, స్కిల్‌/ ట్రేడ్‌/ కంప్యూటర్‌ ప్రొఫిషియన్సీ టెస్ట్‌ ఆధారంగా అభ్యర్థులను ఎంపిక చేస్తారు.

గ్రాడ్యుయేట్‌ ట్రెయినీ (ఫైనాన్స్‌) -03, గ్రాడ్యుయేట్‌ ట్రెయినీ (హెచ్‌ఆర్‌)-04, డిప్లొమా ట్రెయినీ (సివిల్‌/ మెకానికల్‌/ ఎలక్ట్రికల్‌/ కెమికల్‌)- 37, ట్రెయినీ (జియాలజిస్ట్‌/పెట్రోలజిస్ట్‌)-08, ట్రెయినీ కెమిస్ట్‌-04 ఖాళీలు ఉన్నాయి. మొత్తం 56 పోస్టుల్లో అన్‌రిజర్వుడ్‌కు 22, ఈడబ్ల్యూఎస్‌కు 06, ఓబీసీ-ఎన్‌సీఎల్‌కు 15, ఎస్సీలకు 9, ఎస్టీలకు 04 కేటాయించారు. 

ఏ అర్హతలు ఉండాలి?

1. గ్రాడ్యుయేట్‌ ట్రెయినీ (ఫైనాన్స్‌): కామర్స్‌ డిగ్రీ.

2. గ్రాడ్యుయేట్‌ ట్రెయినీ (హెచ్‌ఆర్‌): ఏదైనా డిగ్రీ.

3. డిప్లొమా ట్రెయినీ (సివిల్‌/ మెకానికల్‌/ ఎలక్ట్రికల్‌/ కెమికల్‌ ఇంజినీరింగ్‌): సివిల్‌/ మెకానికల్‌/ ఎలక్ట్రికల్‌/ కెమికల్‌ ఇంజినీరింగ్‌లో మూడేళ్ల డిప్లొమా.

4. ట్రెయినీ (జియాలజిస్ట్‌/పెట్రోలజిస్ట్‌): జియాలజీ/  అప్లైడ్‌ జియాలజీలో డిగ్రీ.

5. ట్రెయినీ కెమిస్ట్‌: మూడేళ్ల ఇంజినీరింగ్‌ డిప్లొమా/ కెమిస్ట్రీ ప్రధాన సబ్జెక్టుగా సైన్స్‌ డిగ్రీ. 

‣ ఈ పోస్టులన్నింటికీ రెగ్యులర్‌గా కోర్సులు పూర్తిచేసిన అభ్యర్థులు మాత్రమే దరఖాస్తు చేయడానికి అర్హులు. యూఆర్‌/ ఓబీసీ (ఎన్‌సీఎల్‌)/ఈడబ్ల్యూఎస్‌ అభ్యర్థులు 60 శాతం, ఎస్సీ/ఎస్టీ అభ్యర్థులు 50 శాతం మార్కులతో డిగ్రీ పాసవ్వాలి. 

‣ ఎంఎస్‌-ఆఫీస్, విండోస్‌ పరిజ్ఞానం తప్పనిసరి. 

‣ అన్ని పోస్టులకూ 26 సంవత్సరాలు మించకూడదు. గరిష్ఠ వయసులో ఓబీసీ (ఎన్‌సీఎల్‌) అభ్యర్థులకు 3 ఏళ్లు, ఎస్సీ/ఎస్టీలకు 5 ఏళ్లు, ఈఎస్‌ఎంలకు 3 ఏళ్లు, పీడబ్ల్యూబీడీ అభ్యర్థులకు 10-15 సంవత్సరాలు, కేంద్ర/రాష్ట్ర ప్రభుత్వ ఉద్యోగులకు 5 ఏళ్ల సడలింపు ఉంటుంది. 

‣ అన్‌రిజర్వుడ్, ఈడబ్ల్యూఎస్, ఓబీసీ (ఎన్‌సీఎల్‌) కేటగిరీలకు చెందిన పురుష అభ్యర్థులకు దరఖాస్తు   ఫీజు రూ.500. దీన్ని ఆన్‌లైన్‌లో చెల్లించాలి. మహిళలు,  ఎస్సీ/ఎస్టీ/ పీడబ్ల్యూబీడీ/ ఈఎస్‌ఎం కేటగిరీలకు  చెందిన అభ్యర్థులకు ఫీజు లేదు. 

ఎంపిక విధానం

రాత పరీక్ష, స్కిల్‌/ ట్రేడ్‌/ కంప్యూటర్‌ ప్రొఫిషియన్సీ టెస్ట్‌ ఆధారంగా అభ్యర్థులను ఎంపిక చేస్తారు. వయసు, విద్యార్హతలు, అనుభవం ఆధారంగా ముందుగా కంప్యూటర్‌ ఆధారిత పరీక్ష (సీబీటీ)కు ఎంపికచేస్తారు. 

సీబీటీ: దీంట్లో మల్టిపుల్‌ ఛాయిస్‌ ప్రశ్నలు ఉంటాయి. ప్రశ్నపత్రం హిందీ, ఇంగ్లిష్‌ భాషల్లో ఉంటుంది. రెండు పేపర్లు ఉంటాయి. పేపర్‌-1లో ప్రొఫెషనల్‌ నాలెడ్జ్‌కు సంబంధించిన 100 ఆబ్జెక్టివ్‌ ప్రశ్నలు ఉంటాయి. పేపర్‌-2లో జనరల్‌ నాలెడ్జ్‌/అవేర్‌నెస్, రీజనింగ్, న్యూమరికల్‌ ఎబిలిటీకి, జనరల్‌ ఇంగ్లిష్‌కు చెందిన 50 ఆబ్జెక్టివ్‌ ప్రశ్నలు ఉంటాయి. ప్రతి ప్రశ్నకూ 1 మార్కు. నెగెటివ్‌ మార్కింగ్‌ లేదు. జనరల్‌ (యూఆర్‌), ఈడబ్ల్యూఎస్, ఓబీసీ (ఎన్‌సీఎల్‌) అభ్యర్థులు ప్రతి పేపర్‌లోనూ 40 శాతం, ఎస్సీ/ ఎస్టీ/ పీడబ్ల్యూబీడీ అభ్యర్థులు 35 శాతం మార్కులు సాధించాలి. దీంట్లో ప్రతిభ చూపిన అభ్యర్థులను స్కిల్‌/ ట్రేడ్‌/ కంప్యూటర్‌ ప్రొఫిషియన్సీ టెస్ట్‌కు 1:5 నిష్పత్తిలో ఎంపిక చేస్తారు. ఇది అర్హత పరీక్ష మాత్రమే. రాత పరీక్షలో సాధించిన మార్కుల ఆధారంగానే అభ్యర్థుల తుది జాబితాను రూపొందిస్తారు. 

రాత పరీక్ష కేంద్రాలు: ముంబయి, నాగ్‌పుర్, త్రివేండ్రం, కొచ్చి, భువనేశ్వర్, నాగర్‌కోయల్‌. అభ్యర్థులు రెండు కేంద్రాలను ఎంపిక చేసుకోవచ్చు. ఆ తర్వాత వీటిని మార్చడానికి అవకాశం ఉండదు. ఎంపికైన అభ్యర్థులకు మెడికల్‌ ఎగ్జామినేషన్‌ నిర్వహిస్తారు. వీరిని దేశంలోని సంస్థ యూనిట్లు/ ఆఫీసుల్లో ఎక్కడైనా నియమించవచ్చు. 

సన్నద్ధత: పేపర్‌-1లో డిగ్రీ లేదా డిప్లొమాలో చదివిన సబ్జెక్టుల నుంచి ప్రశ్నలు ఇస్తారు. కాబట్టి వాటిని పునశ్చరణ చేసుకోవాలి. చదివన అంశాలేనని నిర్లక్ష్యం చేయకుండా వాటిపై పట్టు సాధించాలి. 

‣ బ్యాంక్, ఆర్‌ఆర్‌బీ పోటీ పరీక్షల పాత ప్రశ్నపత్రాల్లోని జనరల్‌ నాలెడ్జ్‌/ అవేర్‌నెస్, రీజనింగ్, న్యూమరికల్‌ ఎబిలిటీకి, జనరల్‌ ఇంగ్లిష్‌కు సంబంధించిన ప్రశ్నలను సాధన చేయడం వల్ల ప్రయోజనం ఉంటుంది. 

‣ వివిధ వెబ్‌సైట్లలో అందుబాటులో ఉండే నమూనా పరీక్షలు రాస్తే మేలు. ఏయే అంశాల్లో మెరుగ్గా ఉన్నారో, వేటిల్లో వెనకబడి ఉన్నారనే విషయంలో స్పష్టత వస్తుంది. 

‣ నమూనా పరీక్షలు రాయడంతో నైపుణ్యాలను ఎప్పటికప్పుడు సమీక్షించుకుని మెరుగుపరుచుకునే వీలు  కలుగుతుంది. 

‣ పట్టు తక్కువ ఉన్న చాప్టర్లకు ఎక్కువ సమయాన్ని కేటాయించి పరిజ్ఞానాన్ని పెంచుకోవచ్చు. 

‣ పోటీ పరీక్షల్లో సమయానికి ఎక్కువ ప్రాధాన్యం ఉంటుంది. నిర్ణీత వ్యవధిలో ప్రశ్నలన్నింటికీ సమాధానాలు రాయడంపైనే విజయం ఆధారపడి ఉంటుంది. సాధన ద్వారా దీనిపై పట్టు సాధించవచ్చు.  

‣ దరఖాస్తుకు చివరి తేదీ: 14.11.2023

‣ వెబ్‌సైట్‌: https://www.irel.co.in/

-----------------------------------------------------------------------------------------------------------

మరింత సమాచారం... మీ కోసం!

‣ స్తబ్ధత వీడితే కొలువు కొట్టొచ్చు!

‣ ఎయిమ్స్‌ భోపాల్‌లో నాన్‌ఫ్యాకల్టీ పోస్టులు

‣ ప్రసిద్ధ సంస్థల్లో పరిశోధనలకు.. సీఎస్‌ఐఆర్‌ నెట్‌

‣ ఉద్యోగ సాధనకు డిజిటల్‌ వ్యూహం!