తరగతిలో పాఠాలు చెప్పడమే కాదు, ఆపై ఏ క్షణమైనా సందేహాలు తీర్చే టీచర్లూ చాలామంది కదూ! ఈ టీచరమ్మా అంతే! అయితే ఈమె పాఠాలను తరగతిలో చెప్పదు కానీ... సందేహాలన్నీ మనం అడిగిన భాషలో తీర్చేస్తుంది. ఇంతకీ ఎవరీ టీచర్‌?
పేరు మలార్‌. సంప్రదాయ కట్టు, నిండైన నగలతో అచ్చమైన భారతీయ మహిళలా ఉంటుంది. అయితే మనిషి కాదండోయ్‌... ఏఐ. ప్రపంచంలోనే తొలి అటానమస్‌ ఏఐ యూనివర్సిటీ ప్రొఫెసర్‌. ఈమెను చెన్నైకి చెందిన ‘హైవ్‌’ అనే సంస్థ రూపొందించింది. తమిళనాడులోని అన్నా యూనివర్సిటీలోని ఇంజినీరింగ్‌ కోర్సులకు సంబంధించిన సిలబస్‌ని అంతా బోధించగలదు. విద్యార్థి ప్రశ్న అడగగానే బోలెడు మెటీరియల్‌ని రిఫర్‌ చేసి మరీ సమాచారం అందిస్తుంది.
పదేళ్ల పిల్లాడు సైతం అర్థం చేసుకునేలా చెప్పడం మలార్‌ ప్రత్యేకత. పైగా స్థానిక భాషల్లో బోధిస్తుంది... అదీ వాట్సాప్‌లో! కంపెనీ నిర్వాహకులు కొందరు విద్యార్థుల నుంచి అభిప్రాయాలు సేకరించినప్పుడు ‘కొత్త యాప్‌లు వేసుకోవడం వల్ల మెమరీ దండగ. పైగా డేటా ఖర్చు’ అన్నారట. అందుకే వాట్సాప్‌లో సేవలు అందించేలా రూపొందించారు. అయితే రోజుకి 20 ప్రశ్నలకు మాత్రమే ఉచితంగా సమాధానాలు పొందుతారు. అంతకన్నా మించితే డబ్బులు చెల్లించాల్సి ఉంటుంది. ప్రస్తుతం అన్నా యూనివర్సిటీకే! ఇకపై ఇతర వర్సిటీలతోనూ అనుసంధానించే పనిలో ఉన్నారట నిర్వాహకులు.
మరింత సమాచారం... మీ కోసం!
‣ వాలంటరీ వర్క్‌తో ఐటీ ఉద్యోగానికి తోవ!
‣ పొరపాట్లు దిద్దుకుంటే.. పక్కా గెలుపు!
