• facebook
  • whatsapp
  • telegram

Police Recruitment: సీసీ కెమెరాల నీడలో పరుగు పందెం

* పీఈటీ నిర్వహణపై టీఎస్‌ఎల్‌పీఆర్‌బీ దృష్టి
* బెటాలియన్లు, పోలీస్‌ శిక్షణ కేంద్రాల్లో ఏర్పాట్లు 

 

ఈనాడు, హైదరాబాద్‌: ఎస్సై, కానిస్టేబుళ్ల స్థాయి పోస్టుల ఎంపికలో మలి అంకంపై తెలంగాణ రాష్ట్రస్థాయి నియామక మండలి(టీఎస్‌ఎల్‌పీఆర్‌బీ) దృష్టి సారించింది. ప్రాథమిక రాతపరీక్ష ద్వారా అభ్యర్థుల వడబోత పూర్తి కావడంతో ఫిజికల్‌ ఎఫీషియెన్సీ టెస్ట్‌(పీఈటీ), ఫిజికల్‌ మెజర్‌మెంట్‌ టెస్ట్‌(పీఎంటీ) వంటి శారీరక సామర్థ్య పరీక్షల నిర్వహణకు సన్నద్ధమవుతోంది. రాతపరీక్షలో సుమారు 2.69 లక్షల మంది అర్హత సాధించారు. వీరు పార్ట్‌-2 దరఖాస్తులు సమర్పించేందుకు నవంబరు 10 వరకు గడువు ఉంది. దరఖాస్తు చేసిన అభ్యర్థులకు పీఈటీ పరీక్షలో భాగంగా తొలుత పరుగుపందెం నిర్వహించనుంది. ఇందుకోసం మైదానాలను ఎంపిక చేసే పనిలో మండలి నిమగ్నమైంది. పోలీస్‌ శిక్షణ కేంద్రాలు, బెటాలియన్లపై దృష్టి సారించింది. మొత్తం 12 కేంద్రాల్లో పోటీలు జరిగే అవకాశాలున్నాయి. వీటి నిర్వహణలో సాంకేతిక పరిజ్ఞానం వినియోగంపై మండలి ఉన్నతాధికారులు దృష్టి సారించారు.
 

చేతులకు రిస్ట్‌ బ్యాండ్‌లు
గతంలో పరుగు పోటీల నిర్వహణపై కొన్ని అనుమానాలు వ్యక్తమయ్యేవి. పోటీలను పర్యవేక్షించే అధికారులు తమకు తెలిసిన అభ్యర్థుల విషయంలో అనుకూలంగా వ్యవహరించే వారన్న ఆరోపణలు వచ్చేవి. అభ్యర్థులు ముగింపు గీత దాటే సమయాల నమోదులో తేడాలకు ఆస్కారముండేది. అర్హత సాధించని అభ్యర్థులు ఆరోపణలు చేసేందుకు తావిచ్చేది. ఈ నేపథ్యంలో ఈసారి పరుగుపందెం పోటీలను సీసీ కెమెరాల్లో రికార్డు చేయనున్నారు. అభ్యర్థి పరుగు ప్రారంభించినప్పటి నుంచి పూర్తి చేసేవరకు మొత్తం ప్రక్రియ కెమెరాల పర్యవేక్షణలో జరగనుంది. ముఖ్యంగా ప్రారంభ, ముగింపు ప్రాంతాలను క్షుణ్ణంగా పరిశీలించనున్నారు. పరుగును పూర్తి చేసిన సమయాన్ని బట్టి మార్కులు కేటాయిస్తారు. వీటిపై అభ్యర్థులెవరైనా అభ్యంతరం తెలిపితే కెమెరా ఫీడ్‌ను పరిశీలించనున్నారు. అలాగే అభ్యర్థులు మైదానంలో అడుగుపెట్టిన వెంటనే చేతికి రేడియో ఫ్రీక్వెన్సీ ఐడెంటిఫికేషన్‌(ఆర్‌ఎఫ్‌ఐడీ) పరిజ్ఞానంతో కూడిన రిస్ట్‌ బ్యాండ్‌ తగిలించనున్నారు. దీనివల్ల వారు మైదానంలో ఏ సమయంలో ఎక్కడ ఉన్నారో తెలుసుకునే వీలు కలుగుతుంది. ఈ పరిజ్ఞానాన్ని తొలిసారిగా వినియోగించనున్నారు. ఒక్కో మైదానంలో సుమారు 130 మంది పోలీస్‌ అధికారులు, సిబ్బంది పర్యవేక్షించనున్నారు.
 

Read Latest jobs, Latest notifications and Latest govt jobs 

Follow us on Facebook, Twitter, Koo, Share chatGoogle News Subscribe our Youtube Channel.

Posted Date : 03-11-2022

గమనిక : ప్రతిభ.ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారులు, సంస్థల నుంచి వస్తాయి. మరి కొన్ని ప్రకటనలు పాఠకుల అభిరుచి మేరకు కృత్రిమ మేధస్సు సాంకేతికత సాయంతో ప్రదర్శితమవుతుంటాయి. ఆ ప్రకటనల్లోని ఉత్పత్తులను లేదా సేవలను పాఠకులు స్వయంగా విచారించుకొని, జాగ్రత్తగా పరిశీలించి కొనుక్కోవాలి లేదా వినియోగించుకోవాలి. వాటి నాణ్యత లేదా లోపాలతో ఈనాడు యాజమాన్యానికి ఎలాంటి సంబంధం లేదు. ఈ విషయంలో ఉత్తర ప్రత్యుత్తరాలకు, ఈ-మెయిల్స్ కి, ఇంకా ఇతర రూపాల్లో సమాచార మార్పిడికి తావు లేదు. ఫిర్యాదులు స్వీకరించడం కుదరదు. పాఠకులు గమనించి, సహకరించాలని మనవి.