* అత్యధిక సీట్లు పొందిన రాష్ట్రాల్లో 4, 5 స్థానాల్లో తెలంగాణ, ఏపీ

ఈనాడు, హైదరాబాద్‌: దేశంలో ఐఐటీల్లోని 18.49 శాతం బీటెక్‌ సీట్లను తెలుగు రాష్ట్రాల విద్యార్థులు కైవసం చేసుకున్నారు. ఐఐటీల్లో సీట్ల భర్తీకి ఆరు విడతలుగా నిర్వహించిన జాయింట్‌ సీట్‌ అలకేషన్‌ అథారిటీ(జోసా) కౌన్సెలింగ్‌ గత నెలలో ముగిసింది. అత్యధికంగా సీట్లు సాధించిన రాష్ట్రాలు, ఇతర వివరాలను ఐఐటీ బాంబే తాజాగా వెల్లడించింది. జేఈఈ అడ్వాన్స్‌డ్‌ను మొత్తం 1,55,538 మంది రాయగా.. వారిలో 40,712 మంది కౌన్సెలింగ్‌లో పాల్గొనేందుకు అర్హత సాధించారు. చివరికి 16,614 మందికి సీట్లు దక్కాయి. అత్యధికంగా రాజస్థాన్‌ నుంచి 2,184 మంది ఎంపికయ్యారు. ఉత్తర్‌ప్రదేశ్‌(యూపీ), మహారాష్ట్ర వరుసగా రెండు, మూడు స్థానాల్లో నిలిచాయి. 1,644 సీట్లతో తెలంగాణ విద్యార్థులు నాలుగో.. 1,428 సీట్లతో ఆంధ్రప్రదేశ్‌ విద్యార్థులు అయిదో స్థానంలో నిలిచారు. మొత్తం 16,614 సీట్లలో రెండు తెలుగు రాష్ట్రాల నుంచి 3,072 మంది(18.49 శాతం) సీట్లు సాధించారు.

* తెలుగు రాష్ట్రాల నుంచి ఈసారి 32,255 మంది అడ్వాన్స్‌డ్‌ రాశారు. ఈ సంఖ్య మొత్తం అభ్యర్థుల్లో 20.73 శాతంతో సమానం.

* దేశవ్యాప్తంగా 3,310 మంది అమ్మాయిలకు ఈసారి బీటెక్‌ సీట్లు లభించాయి. జోధ్‌పుర్‌, రోపాల్‌, ధార్వాడ్‌, జమ్మూ, వారాణాసి, ధన్‌బాద్‌ ఐఐటీల్లో స్వల్పంగా సీట్లు మిగిలిపోయాయి. ఐఐటీల్లో సీట్లు పొందినవారిలో ఏపీ కంటే తెలంగాణ విద్యార్థులు ఎక్కువ మంది ఉన్నా.. శాతంపరంగా ఏపీ ముందంజలో ఉంది.