• facebook
  • whatsapp
  • telegram

Salary Increments: 2022లో 8.6% వేతన పెంపు!  

డెలాయిట్‌ సర్వేలో వెల్లడి

ఉద్యోగుల వేతన పెంపు 2022 నాటికి కొవిడ్‌ మునుపటి స్థాయికి చేరుకుంటుందని ప్రముఖ కంపెనీ డెలాయిట్ చేసిన సర్వేలో వెల్ల‌డ‌య్యింది. 
2022లో వేతనాలు సగటున 8.6 శాతం పెరుగుతాయని డెలాయిట్  సర్వేలో తెలిపింది. కొవిడ్‌ ఆంక్షలతో సంక్షోభంలో చిక్కుకున్న వ్యాపార కార్యకలాపాలు క్రమంగా పుంజుకుంటున్నాయి. డెలాయిట్‌ నిర్వహించిన సర్వేలో పాల్గొన్న కంపెనీల్లో దాదాపు 25 శాతం సంస్థలు 2022 నాటికి రెండంకెల వృద్ధి సాధిస్తామని ధీమా వ్యక్తం చేశాయి. కరోనా కట్టడి కోసం విధించిన ఆంక్షల నేపథ్యంలో వేతన పెంపు సగటున 4.4 శాతానికి పడిపోయింది. వ్యాపార రంగం పుంజుకుంటుండడంతో ప్రస్తుతం పెంపు సగటున 8 శాతానికి చేరుకుంది. వచ్చే ఏడాదికి అది మరింత పెరిగి 8.6 శాతానికి చేరుకుంటుందని సర్వే అంచనా వేసింది.
స‌ర్వేలోని ముఖ్యాంశాలు:
* 2022లో ఐటీ సెక్టార్‌లో వేతనాలు అధికంగా పెరగనున్నాయి. కొన్ని కంపెనీలు రెండంకెల పెంపును సైతం ప్రతిపాదించనున్నాయి. తర్వాత లైఫ్‌ సైన్సెస్‌ రంగంలో పెరుగుతాయి. రిటైల్‌, హాస్పిటాలిటీ, రెస్టారెంట్లు, మౌలిక, స్థిరాస్తి రంగంలో మాత్రం వేతనాల పెంపు మందగించనుంది.
నైపుణ్యం, పనితీరును బట్టి సంస్థలు పెంపును నిర్ణయించనున్నాయి. సగటు పనితీరు కనబరిచిన వారితో పోలిస్తే.. బాగా రాణించిన వారికి 1.8 రెట్లు అధిక వేతనం అందవచ్చు.
2021లో 12 శాతం మందికి పదోన్నతులు లభించాయి. 2020లో ఇది 10 శాతంగా ఉంది. దాదాపు 78 శాతం కంపెనీలు నియామకాలను కొవిడ్‌ మునుపటి స్థాయిలో చేపడుతున్నాయి.
*దాదాపు 12 శాతం కంపెనీలు పెంచిన వేతనాలకు అనుగుణంగా భత్యాలు, ఇతర ప్రయోజనాలను సవరించాయి. అలాగే కొవిడ్‌ నేపథ్యంలో 60 శాతం సంస్థలు ఆరోగ్య బీమా పాలసీలనూ సవరించాయి.

Posted Date : 20-09-2021