* 15 నిమిషాల ముందు గేట్ల మూసివేత
ఈనాడు, హైదరాబాద్‌: రాష్ట్రంలో 503 గ్రూప్‌-1(Group-1) సర్వీసు ఉద్యోగాల భర్తీకి జూన్ 11న నిర్వహించే రాతపరీక్షకు టీఎస్‌పీఎస్సీ(TSPSC) ఏర్పాట్లు పూర్తిచేసింది. ఉదయం 10.30 గంటల నుంచి మధ్యాహ్నం 1 గంట వరకు పరీక్ష జరుగుతుంది. పరీక్ష ప్రారంభమయ్యే సమయానికి 15 నిమిషాల ముందు గేట్లు మూసివేస్తామని ప్రకటించింది. ఈ మేరకు జిల్లా కలెక్టర్లు, ఎస్పీలు, జాయింట్‌ కలెక్టర్లు, చీఫ్‌ సూపరింటెండెంట్లతో టీఎస్‌పీఎస్సీ ఛైర్మన్‌ జనార్దన్‌రెడ్డి సమీక్ష నిర్వహించారు. అభ్యర్థులు పరీక్ష కేంద్రంలోకి వచ్చేటప్పుడు హాల్‌టికెట్‌(Hallticket)తో పాటు గుర్తింపు కార్డు(Identity Card) తీసుకురావాలి.
2.75 లక్షల మంది డౌన్‌లోడ్‌..
గ్రూప్‌-1 పరీక్షకు రాష్ట్రవ్యాప్తంగా 3,80,052 మంది దరఖాస్తు చేసుకున్నారు. గత ఏడాది నిర్వహించిన ప్రిలిమినరీ పరీక్షకు 2.86 లక్షల మంది హాజరయ్యారు. ప్రశ్నపత్రాల లీకేజీతో పరీక్షను రద్దు చేసిన కమిషన్‌ జూన్ 11న పునఃపరీక్ష నిర్వహిస్తోంది. ఇప్పటివరకు 2.75 లక్షల మంది హాల్‌టికెట్లు డౌన్‌లోడ్‌ చేసుకున్నారు. ఈ పరీక్ష నిర్వహణ కోసం రాష్ట్రవ్యాప్తంగా 994 పరీక్ష కేంద్రాలను కమిషన్‌ ఏర్పాటు చేసింది. అభ్యర్థికి ఇచ్చిన ప్రశ్నపత్రం ఇతర భాషలో ఉంటే వెంటనే ఇన్విజిలేటర్‌ను సంప్రదించి మరొకటి తీసుకోవాలని కమిషన్‌ వర్గాలు పేర్కొన్నాయి. ఓఎంఆర్‌పై(OMR)ప్రశ్నపత్రం కోడ్‌ను తప్పనిసరిగా రాయాలని, దాని ప్రకారమే కీ ఆధారంగా వాల్యుయేషన్‌ జరుగుతుందని పేర్కొన్నాయి.
పకడ్బందీగా ఏర్పాట్లు చేయాలి: సీఎస్‌ శాంతికుమారి
గ్రూప్‌-1 నిర్వహణకు పకడ్బందీగా ఏర్పాట్లుచేసి పరీక్ష సాఫీగా జరిగేలా చూడాలని జిల్లా కలెక్టర్లను సీఎస్‌ శాంతికుమారి ఆదేశించారు. గ్రూప్‌-1 పరీక్షలు.. సుపరిపాలన, సాహిత్య దినోత్సవాల ఏర్పాట్లపై జూన్ 9న సీఎస్‌ టెలీకాన్ఫరెన్స్‌ నిర్వహించారు. జూన్ 10న సుపరిపాలన దినోత్సవం సందర్భంగా జిల్లా, రెవిన్యూ డివిజన్లలో, మండల కేంద్రాల్లో సభలు ఏర్పాటు చేయాలన్నారు. జూన్ 11న సాహిత్య దినోత్సవం సందర్భంగా జిల్లా, మండల కేంద్రాల్లో వివిధ కార్యక్రమాల్ని నిర్వహించాలని సూచించారు.
మరింత సమాచారం... మీ కోసం!
‣ ’జీఆర్‌ఈ’లో ముఖ్య మార్పులివే..
‣ 8,612 ఉద్యోగాలకు ఐబీపీఎస్‌ నోటిఫికేషన్‌
‣ ఇంటెలిజెన్స్‌ బ్యూరోలో ఉద్యోగాలు
‣ డిగ్రీ, బీటెక్‌తో వాయుసేనలో ఉన్నతోద్యోగం
‣ ఇంటర్‌తో ఆర్మీలో చదువు.. ఆపై ఉద్యోగం
‣ Read Latest jobs, Latest notifications and Latest govt jobs
‣ Follow us on Facebook, Twitter, Koo, Share chat, Google News Subscribe our Youtube Channel.
