• facebook
  • whatsapp
  • telegram

జామ్‌ అంటూ ప్రఖ్యాత సంస్థల్లోకి..

ఐఐటీలు, ఐఐఎస్సీ వంటి ప్రఖ్యాత ఇన్‌స్టిట్యూట్లల్లో సైన్స్‌లో పీజీ చేసే అవకాశాన్ని జామ్‌ పరీక్ష కల్పిస్తోంది. ఆసక్తి ఉన్న విభాగాల్లో అంతర్జాతీయ పరిజ్ఞానాన్ని, నైపుణ్యాలను పెంచుకోడానికి ఇదో మంచి వేదిక. డీఆర్‌డీఓ, ఇస్రో వంటి ఉన్నతస్థాయి సంస్థలు, ప్రభుత్వ నిధులతో నడిచే రిసెర్చ్‌ ఆర్గనైజేషన్లు ఈ అభ్యర్థులకు ప్రాధాన్యం ఇస్తున్నాయి.

 

ఐఐటీల్లో ఎమ్మెస్సీ కోర్సుల్లో ప్రవేశానికి నిర్వహించే పరీక్ష జాయింట్‌ అడ్మిషన్‌ టు ఎమ్మెస్సీ - జామ్. ఈ పరీక్షలో చూపిన ప్రతిభతో ఐఐటీలతోపాటు ఇండియన్‌ ఇన్‌స్టిట్యూట్‌ ఆఫ్‌ సైన్స్‌ (ఐఐఎస్సీ), బెంగళూరులో ఇంటిగ్రేటెడ్‌ ఎమ్మెస్సీ; ఎన్‌ఐటీల్లో ఎమ్మెస్సీ, ఇండియన్‌ ఇన్‌స్టిట్యూట్‌ ఆఫ్‌ ఇంజినీరింగ్‌ సైన్స్‌ అండ్‌ టెక్నాలజీ, షిబ్‌పూర్‌; సంత్‌ లౌంగోవాల్‌ ఇన్‌స్టిట్యూట్‌ ఆఫ్‌ ఇంజినీరింగ్‌ అండ్‌ టెక్నాలజీ, పంజాబ్‌; ఇండియన్‌ ఇన్‌స్టిట్యూట్‌ ఆఫ్‌ సైన్స్‌ ఎడ్యుకేషన్‌ అండ్‌ రిసెర్చ్‌ (ఐఐఎస్‌ఈఆర్‌)ల్లో ప్రవేశాలు పొందవచ్చు. మెరిట్‌ ఆధారంగా సీట్లు కేటాయిస్తారు. 

 

ఇవీ సబ్జెక్టులు
పరీక్షను ఆరు సబ్జెక్టుల్లో నిర్వహిస్తున్నారు. అవి బయోటెక్నాలజీ, కెమిస్ట్రీ, జియాలజీ, మ్యాథమెటిక్స్‌, మ్యాథమెటికల్‌ స్టాటిస్టిక్స్‌, ఫిజిక్స్‌. అభ్యర్థులు ఒకటి లేదా గరిష్ఠంగా రెండు సబ్జెక్టులు ఎంచుకోవచ్చు. సెషన్‌-1లో ఒకటి, సెషన్‌-2లో మరొక సబ్జెక్టులో పరీక్ష రాసుకోవచ్చు. సెషన్‌-1లో ఉదయం బయోటెక్నాలజీ, మ్యాథమెటికల్‌ స్టాటిస్టిక్స్‌, ఫిజిక్స్‌ సబ్జెక్టుల్లో పరీక్ష నిర్వహిస్తారు. రెండో సెషన్‌లో మధ్యాహ్నం కెమిస్ట్రీ, జియాలజీ, మ్యాథమెటిక్స్‌ సబ్జెక్టుల్లో పరీక్షలు ఉంటాయి. ఎమ్మెస్సీ, జాయింట్‌ ఎమ్మెస్సీ-పీహెచ్‌డీ, ఎమ్మెస్సీ-పీహెచ్‌డీ డ్యూయల్‌ డిగ్రీ, ఎమ్మెస్సీ-ఎంఎస్‌(రిసెర్చ్‌)/పీహెచ్‌డీ కోర్సుల్లో 20 ఐఐటీలతోపాటు, ఐఐఎస్సీ, ఐఐఎస్‌ఈఆర్‌, ఎన్‌ఐటీలు, ఇతర సంస్థల్లో ప్రవేశం లభిస్తుంది.

అర్హత: ఆయా సంస్థలవారీ అర్హతల్లో స్వల్ప మార్పులు ఉంటాయి. సాధారణంగా ఐఐటీల్లో ప్రవేశం కోరేవారు డిగ్రీలో కనీసం 55 శాతం మార్కులు సాధించాలి. ఎస్సీ, ఎస్టీలైతే 50 శాతం సరిపోతుంది. అదే ఐఐఎస్సీ, బెంగళూరులో ప్రవేశాలకు 60 శాతం మార్కులు తప్పనిసరి. ఎస్సీ, ఎస్టీలకు 50 శాతంగా నిర్ణయించారు. ఎమ్మెస్సీ బయోటెక్నాలజీ కోర్సుకు సైన్స్‌ గ్రాడ్యుయేట్లతోపాటు అగ్రికల్చర్‌, ఫార్మసీ, ఇంజినీరింగ్‌, మెడిసిన్‌ విద్యార్థులు దరఖాస్తు చేసుకోవచ్చు. ఐఐటీలు, ఐఐఎస్సీలో కెమిస్ట్రీ కోర్సులకు డిగ్రీలో కెమిస్ట్రీతోపాటు ఇంటర్‌లో మ్యాథ్స్‌ తప్పనిసరిగా చదివుండాలి. ఎన్‌ఐటీల్లో ప్రవేశాలకు మాత్రం డిగ్రీలో కెమిస్ట్రీ చదివినవాళ్లంతా అర్హులే. మ్యాథ్స్‌, ఫిజిక్స్‌ పీజీ కోర్సులకు డిగ్రీ స్థాయిలో ఆ సబ్జెక్టులు చదవడం తప్పనిసరి. ఎమ్మెస్సీ బయోటెక్నాలజీ ఐఐటీ- బాంబే, రూర్కీ, ఇండోర్‌ ఈ 3 సంస్థలే అందిస్తున్నాయి.

పరీక్ష విధానం: పరీక్షను ఆన్‌లైన్‌లో నిర్వహిస్తారు. వ్యవధి 3 గంటలు. ఆంగ్ల మాధ్యమంలో ప్రశ్నపత్రం ఉంటుంది. ఏ సబ్జెక్టు ప్రశ్నపత్రంలోనైనా మొత్తం 60 ప్రశ్నలు ఉంటాయి. వీటికి వంద మార్కులు. మూడు విభాగాల్లో ప్రశ్నలు అడుగుతారు. అవి.. మల్టిపుల్‌ ఛాయిస్‌, మల్టిపుల్‌ సెలెక్ట్‌, న్యూమరికల్‌ సమాధాన ప్రశ్నలు. వీటిని 3 సెక్షన్లుగా విభజించారు.
సెక్షన్‌-ఎ: ఇందులో మొత్తం 30 మల్టిపుల్‌ ఛాయిస్‌ ప్రశ్నలు వస్తాయి. వీటిలో ఒక మార్కు ప్రశ్నలు పది, రెండు మార్కుల ప్రశ్నలు ఇరవై వస్తాయి. ఒక్కో ప్రశ్నకు 4 ఆప్షన్లు ఇస్తారు. వీటిలో ఒకటి మాత్రమే సరైన సమాధానం ఉంటుంది. రుణాత్మక మార్కులు ఉన్నాయి. తప్పు సమాధానాలకు ఒక మార్కు ప్రశ్నకు 1/3, రెండు మార్కుల ప్రశ్నలకు 2/3 మార్కులు తగ్గిస్తారు.
సెక్షన్‌-బి: ఇందులో పది మల్టిపుల్‌ సెలక్ట్‌ ప్రశ్నలు వస్తాయి. ప్రతి ప్రశ్నకు రెండు మార్కులు. నాలుగు ఆప్షన్లు ఇస్తారు. వీటిలో ఒకటి లేదా అంతకంటే ఎక్కువ ఆప్షన్లు సరైన సమాధానాలుగా ఉండవచ్చు. సరైన ఆప్షన్‌/ ఆప్షన్లను గుర్తిస్తేనే పూర్తి మార్కులు వస్తాయి. పాక్షిక సమాధానానికి మార్కులు కేటాయించరు. రుణాత్మక మార్కులు లేవు.
సెక్షన్‌-సి: ఇందులో 20 న్యూమరికల్‌ ఆన్సర్‌ ప్రశ్నలు ఇస్తారు. వీటికి వాస్తవ సంఖ్య సమాధానంగా ఉంటుంది.ఈ ప్రశ్నలకు ఆప్షన్లు ఉండవు. ఒక మార్కు ప్రశ్నలు పది, రెండు మార్కుల ప్రశ్నలు పది వస్తాయి. రుణాత్మక మార్కులు లేవు.

 

సన్నద్ధత ఎలా?
విశ్లేషణ, తార్కిక సామర్థ్యాలను పరీక్షించేవిధంగా ప్రశ్నలు ఉంటాయి. ముందుగా ప్రాథమికాంశాల నుంచి అధ్యయనం ప్రారంభించాలి. ఇందుకోసం ఇంటర్‌ పాఠ్యపుస్తకాలను క్షుణ్ణంగా చదవాలి. అనంతరం డిగ్రీ పాఠ్యపుస్తకాలు బాగా అధ్యయనం చేయాలి. ఆయా సబ్జెక్టు/ పేపర్లవారీ సిలబస్‌ వివరాలను జామ్‌ వెబ్‌సైట్‌లో పొందుపరిచారు. వాటి ప్రకారం పాఠ్యపుస్తకాల్లోని అంశాలకు అధికప్రాధాన్యం ఇస్తూ అధ్యయనం చేయాలి. సిలబస్‌లో ప్రస్తావించిన అంశాలు పాఠ్యపుస్తకంలో లేకపోతే రిఫరెన్స్‌ పుస్తకాలను ఆశ్రయించాలి. పరీక్షపై అవగాహన కోసం పాతప్రశ్నపత్రాలను పరిశీలించాలి. వీటిని కూడా జామ్‌ వెబ్‌సైట్‌లో పొందుపరిచారు. పరీక్షకు ముందు వీలైనన్ని మాదిరి ప్రశ్నపత్రాలను సాధన చేయాలి. సాధారణంగా 60 శాతం మార్కులు సాధించినవారు ఏదో ఒక ఐఐటీలో సీటు పొందడానికి అవకాశం ఉంది.

కెమిస్ట్రీ సబ్జెక్టులో పరీక్ష రాసే విద్యార్థులు ఫిజికల్‌, ఆర్గానిక్‌ విభాగాలపై అధిక దృష్టి సారించాలి. ఆర్గానిక్‌ విభాగంలో జనరల్‌ ఆర్గానిక్‌ కెమిస్ట్రీ, రియాక్షన్‌ మెకానిజం, స్పెక్టోస్క్రోపీ, స్టీరియో కెమిస్ట్రీ, నేమ్‌డ్‌ రియాక్షన్‌, రియేజెంట్స్‌ తదితర పాఠ్యాంశాలను అనువర్తిత ధోరణిలో అధ్యయనం చేయాలి. ఫిజికల్‌ కెమిస్ట్రీలో క్వాంటమ్‌ కెమిస్ట్రీ, థర్మోడైనమిక్స్‌, కెమికల్‌ కైనటిక్స్‌, ఎలక్ట్రోకెమిస్ట్రీ, సాలిడ్‌ స్టేట్‌ అంశాలను బాగా చదవాలి. ఇనార్గానిక్‌లో సంశ్లిష్ట సమ్మేళనాలు, ఎనలిటికల్‌ కెమిస్ట్రీ, రసాయన బంధం అంశాలపై దృష్టి సారించాలి.

ఫిజిక్స్‌ సబ్జెక్టులో పరీక్ష రాసేవాళ్లు ఫిజికల్‌ ఆప్టిక్స్‌, క్వాంటమ్‌ మెకానిక్స్‌, థర్మోడైనమిక్స్‌, వేవ్స్‌ అండ్‌ ఆసిలేషన్స్‌, హీట్‌, ఆప్టిక్స్‌, మోడ్రన్‌ ఫిజిక్స్‌, న్యూక్లియర్‌ ఫిజిక్స్‌, అటామిక్‌ ఫిజిక్స్‌, క్వాంటమ్‌ థియరీ, స్పెక్టోస్క్రోపీ అంశాలను అధ్యయనం చేయాలి.

మ్యాథ్స్‌ అభ్యర్థులు మ్యాట్రిక్స్‌, డెరివేటివ్స్‌, కాలిక్యులస్‌, వెక్టార్స్‌, ట్రిగనోమెట్రీ, కోఆర్డినేట్‌ జామెట్రీలపై దృష్టి సారించాలి.

బయోటెక్నాలజీలో పరీక్ష రాసేవారు బయాలజీ, కెమిస్ట్రీ, ఫిజిక్స్‌, మ్యాథ్స్‌ సబ్జెక్టులకు చెందిన ముఖ్యాంశాలను చదవాలి. బీఎస్సీ బయోటెక్నాలజీ, మైక్రో బయాలజీ, జెనెటిక్స్‌, బోటనీ, జువాలజీ పాఠ్యపుస్తకాల్లోని అంశాలను అధ్యయనం చేయాలి. ముఖ్యంగా బయోకెమిస్ట్రీలో అమినో ఆసిడ్లు, ప్రొటీన్లు; కార్బోహైడ్రేట్‌ మెటబాలిజం, ఎంజైమ్‌లు, బయోకెమికల్‌ టెక్నిక్‌లు, సెల్‌ సిగ్నలింగ్‌ అంశాలపై శ్రద్ధ పెట్టాలి. జెనెటిక్స్‌, మాలిక్యులర్‌ బయాలజీ విభాగంలో డీఎన్‌ఎ ధర్మాలు, ఆర్‌డీఎన్‌ఎ టెక్నాలజీ, ట్రాన్స్‌స్క్రిప్షన్‌లపై దృష్టి సారించాలి. కెమిస్ట్రీలో స్టీరియో కెమిస్ట్రీ, రియాక్షన్‌ మెకానిజం, నేమ్‌డ్‌ రియాక్షన్‌, కెమికల్‌ కైనెటిక్స్‌, థర్మో డైనమిక్స్‌, సంశ్లిష్ట సమ్మేళనాలు, ఎనలిటికల్‌ కెమిస్ట్రీ పాఠ్యాంశాలను బాగా చదువుకోవాలి. మ్యాథ్స్‌లో మ్యాట్రిక్స్‌, డెరివేటివ్స్‌, కాలిక్యులస్‌, వెక్టార్స్‌, ట్రిగనోమెట్రీ, కోఆర్డినేట్‌ జామెట్రీలపై దృష్టి సారించాలి. మ్యాథ్స్‌, కెమిస్ట్రీలకు చెందిన పాఠ్యాంశాలను ఇంటర్‌ స్థాయిలో చదువుకుంటే సరిపోతుంది.

తెలుగు రాష్ట్రాల్లో పరీక్ష కేంద్రాలు: హైదరాబాద్‌, విజయవాడ, విశాఖపట్నం, తిరుపతి, వరంగల్‌.

వెబ్‌సైట్‌: https://jam.iitkgp.ac.in/

- ఎస్‌. కిరణ్‌ కుమార్‌

REFERENCE BOOKS LIST

Chemistry Books
Organic Chemistry : Clayden, Carey Sundberg
Physical Chemistry : P.W.Atkins, K.L.Kapoor
Inorganic Chemistry : J.D.Lee, Shriver & Atkins

 

Biology Books
Biochemistry : Voet & voet, Albert Lehninger
Microbiology : Prescott
Cellbiology : Alberts, Lodish
Molecular Biology : Weaver
Immunology : Kuby
Genetics : Griffith, Suzuki
Animal Physiology : Nielsen
Plant Physiology : Tiez and Zeiger

 

Maths Books
Algebra : Bhattacharya, Devid C Lay
Calculus : M.J.Strauss, H.Anton
Real Analysis : Shanti Narayan, Richard R Goldberg
Differential Equations : Sastri SS, Collins P.J.
Complex Numbers : Murry R Spiegel
Probability of Statistics : C.E.Weatherban, Das Gupta, Ray & Sharma

 

Physics Books
Mechanics : D S Mathur, Daniel
Waves and Otpics : D R Brown, N K Bajaj
Electricity & Magnetism : D C Tayal, Edward M Purcell
Kinetic Theory & Thermodynamics : D John, Charles E Hect
Modern Physics : D.C.Pandey, B L Theraja
Solid State Physics : S.P.Singh, D.K.Bhattacharya

 

Institute Name Website
1. IISc Bangalore
2. IIT Bhubaneswar
3. IIT Bombay
4. IIT Delhi
5. IIT Gandhinagar
6. IIT Guwahati
7. IIT Hyderabad
8. IIT Indore
9. IIT Kanpur
10. IIT Kharagpur
11. IIT Madras
12. IIT Roorkee
13. IIT Roopar
14. IIT Patna
www.iisc.ernet.in
www.iitbbs.ac.in
www.iitb.ac.in
www.iitd.ac.in
www.iitgn.ac.in
www.iitg.ac.in
www.iith.ac.in
www.iiti.ac.in
www.iitk.ac.in
www.iitkgp.ac.in
www.iitm.ac.in
www.iitr.ac.in
www.iitrpr.ac.in
www.iitp.ac.in

Posted Date: 21-10-2020


 

ప్రవేశ పరీక్షలు

 

లేటెస్ట్ నోటిఫికేష‌న్స్‌